ԱՄՆ Սենատի դեմոկրատ անդամները պաշտոնապես դիմել են պաշտպանության նախարար Փիթ Հեգսեթին՝ պահանջելով պարզաբանումներ զինծառայողների թեստոստերոնի մակարդակի պարտադիր ստուգման նոր հրամանի վերաբերյալ։ Սենատորներ Ռիչարդ Բլումենթալը, Մեյզի Հիրոնոն, Գարի Փիթերսը, Էլիզաբեթ Ուորենը և Ռուբեն Գալյեգոն նամակով նախարարությունից պահանջել են ներկայացնել ծրագրի գիտական հիմնավորումը, ֆինանսական ծախսերը և հնարավոր ռիսկերը։
Հեգսեթի հրամանով՝ 30 և ավելի բարձր տարիքի բոլոր զինծառայողները պետք է անցնեն թեստոստերոնի ստուգում՝ ամենամյա բուժզննման շրջանակում։ Թեև թեստոստերոնի փոխարինող թերապիան (TRT) կամավոր է մնում, սենատորները մտահոգություն են հայտնել, որ նախարարությունը չի ապացուցել, թե ինչպես է այս քայլը բարելավելու զինված ուժերի մարտունակությունը։ Ծրագիրը պետք է հստակեցվի մինչև օգոստոսի 15-ը, սակայն դեռևս անհասկանալի են ստուգումների հստակ չափանիշները և այն հարցը, թե արդյոք նորմայից ցածր ցուցանիշները կարող են վարչական հետևանքներ առաջացնել զինծառայողների համար։
Այս նախաձեռնությունը Հեգսեթի՝ պաշտպանության նախարարի պաշտոնում վարած քաղաքականության մի մասն է, որը շեշտադրում է ֆիզիկական պատրաստվածությունը և ավանդական արժեքները։ Քննադատները նշում են, որ նման քաղաքականությունը կարող է վնասել կին զինծառայողների դիրքերին և հակասել ներառականությանը։ Բժշկական փորձագետները նախազգուշացնում են, որ կլինիկական ցածր թեստոստերոնը հանդիպում է տղամարդկանց միայն մոտ 2%-ի մոտ, և զանգվածային ստուգումները կարող են սխալ պատկերացումներ ստեղծել։
Բացի այդ, փորձագետներն ու վետերանները նշում են, որ զինվորական ճամբարներում սննդակարգի և քնի ռեժիմի խնդիրները, որոնք նույնպես ազդում են հորմոնալ ֆոնի վրա, դեռևս պատշաճ լուծում չեն ստացել։