ԱՄՆ նախագահի ազգային անվտանգության հարցերով օգնական Ռոբերտ Օ՛Բրայենը հավանական է համարել Ռուսաստանի ԱԳ նախարար Սերգեյ Լավրովի Վաշինգտոն այցի ժամանակ նրա հանդիպումը ամերիկացի առաջնորդ Դոնալդ Թրամփի հետ: Այս մասին հաղորդում է CBS-ը:
«Կարծում եմ՝ հավանականություն կա, որ դա տեղի կունենա: Մենք աշխատում ենք այդ ուղղությամբ»,-ասել է նա:
Օ՛Բրայենի խոսքով՝ Թրամփի և Լավրովի հանդիպումը կհամապատասխաներ փոխադարձության սկզբունքներին:
«Երբ ԱՄՆ պետքարտուղար Պոմպեոն Ռուսաստանում էր, Պուտինը նրա հետ հանդիպել է: Այնպես որ, փոխադարձության սկզբունքից ելնելով՝ մենք նման տարբերակը դիտարկում ենք: Բայց մենք դիտարկում ենք նաև այլ տարբերակներ: Տեսնենք՝ կկարողանանք արդյոք այդպես անել»,-ասել է ԱՄՆ նախագահի օգնականը։
Օ՛Բրայենը հայտնել է նաև, որ Թրամփի և Լավրովի հանդիպման դեպքում քննարկվելու է ընդհանրապես սպառազինության վերահսկման թեման:
Ավելի վաղ The Washington Post պարբերականը, վկայակոչելով ԱՄՆ վարչակազմի ներկայացուցիչներին, հայտնել էր, որ դեկտեմբերի 10-ին Վաշինգտոնում Պոմպեոն մտադիր է Լավրովի հետ քննարկել երկկողմ հարաբերությունները, սպառազինությունների վերահսկումը, Սիրիայում և Ուկրաինայում իրավիճակը: Պարբերականին հայտնի չէր Թրամփի հետ Լավրովի հանդիպման հավանականության մասին:
ՌԴ ԱԳՆ ղեկավարը վերջին անգամ Վաշինգտոն է այցելել 2017 թվականին և այդ ժամանակ ընդունվել է ԱՄՆ նախագահ Դոնալդ Թրամփի կողմից: