Իռլանդիայի Առողջապահության ծառայությունը (HSE) հայտարարել է բժշկական, GP այցելությունների և երկարատև հիվանդությունների քարտերի թողարկման ժամանակավոր դադարեցման մասին։ Որոշումը կայացվել է այն բանից հետո, երբ քարտերի տպագրությունը սպասարկող արտաքին ընկերության համակարգերը ենթարկվել են կիբերհարձակման։
Հուլիսի 10-ին հրապարակված պաշտոնական հաղորեն հաղորդագրության համաձայն՝ HSE-ն անմիջապես ակտիվացրել է անվտանգության արձանագրությունները։ Կազմակերպությունը հայտնել է, որ իր ներքին համակարգերը չեն վտանգվել, սակայն, ըստ նախնական տվյալների, հարձակման հետևանքով HSE-ի տվյալների փոքր մասը կարող էր հասանելի դառնալ չարագործներին։
Ազդեցությունը բնակչության վրա
Չնայած պլաստիկ քարտերի տպագրության դադարեցմանը՝ HSE-ն վստահեցնում է, որ քաղաքացիների առողջապահական սպասարկման որակը կամ հասանելիությունը չի փոխվել։ Ծառայության պարզաբանմամբ՝ բոլոր դիմումների մշակումը շարունակվում է բնականոն հունով, իսկ պացիենտների իրավունքները՝ անփոփոխ։
«Մենք ապահովել ենք, որ մարդկանց մատուցվող ծառայությունների ծավալում որևէ կրճատում չլինի», – նշել են գերատեսչությունում։ Ներկայումս պլաստիկ քարտերի փոխարեն քաղաքացիներին տրամադրվում են ժամանակավոր վկայականներ, որոնք հավաստում են նույն իրավունքները։ Եվրոպական առողջապահական ապահովագրության քարտերը (EHIC) հասանելի են HSE-ի բջջային հավելվածի միջոցով։
Բժշկական հաստատությունները, դեղատները և ընտանեկան բժիշկները շարունակում են պացիենտների իրավասությունը ստուգել թվային ալիքների միջոցով, ինչը երաշխավորում է, որ քարտերի բացակայությունը խոչընդոտ չի հանդիսանա բուժօգնություն ստանալու համար։ Խնդիրների դեպքում քաղաքացիները կարող են զանգահարել 0818 224 478 հեռախոսահամարով։