Ինսուլտն անսպասելի չի լինում, դրան նախորդում են վառ ախտանիշներ, որոնց պետք է մեծ ուշադրություն դարձնել։ Սրտաբան, բժշկական գիտությունների դոկտոր Յուրի Սերեբրյանսկին «Народные Новости»-ին պատմել է, թե ինչպես ճիշտ կանխարգելել հիվանդությունները և թվարկել է այն հիմնական նշանները, որոնք կարող են ազդարարել ինսուլտի մոտենալու մասին։
Սերեբրյանսկին նշել է, որ ինսուլտի հիմնական ազդարարը իշեմիկ գրոհն է։ Այն արտահայտվում է ուժեղ գլխացավերով, գլխապտույտով, սրտխառնոցով և փսխումով։ Բացի այդ, հիվանդության զարգացման նշան են հիպերտոնիկ ճգնաժամերը՝ զարկերակային ճնշման կտրուկ աճով։
Գոյություն ունի ինսուլտի երկու տեսակ՝ իշեմիկ և հեմոռագիկ։ Իշեմիկ ինսուլտը տեղի է ունենում գլխուղեղի անոթների և քներակների խցանման հետեւանքով, ինչի պատճառով ուղեղի հատվածներում արյան հոսքը խախտվում է։ Հեմոռագիկ ինսուլտը կապված է արյունահոսության եւ արյունատար անոթի պատռվելու, գիտակցության կորստի, շարժողական ակտիվության խանգարման հետ»,- բացատրել է բժիշկը։
Սրտաբանի խոսքով՝ շատ կարևոր է ժամանակին բացահայտել հիվանդությունը և ինսուլտի տեսակը։ Դրա համար անհրաժեշտ է կատարել գլխուղեղի համակարգչային տոմոգրաֆիա և ՄՌՏ՝ անոթների վիճակը տեսնելու համար։
«Ինսուլտի կանխարգելումը հիպերտոնիայի բուժումն է։ Անհրաժեշտ է ժամանակին հայտնաբերել իշեմիկ գրոհները։ Խնդիրների հայտնաբերման դեպքում պետք է խորհրդակցել նյարդաբանի հետ: Կարեւոր է վերահսկել խոլեստերինի նյութափոխանակության խախտումը: Բուժման և կանխարգելման ժամանակ կարևոր է հաշվի առնել բազմաթիվ պահեր։ Պետք է վարել առողջ ապրելակերպ, չհրաժարվել ֆիզիկական ակտիվությունից։ Շատ կարևոր է արյան ճնշման ուսումնասիրություններ անցկացնել՝ օրական տատանումներին հետեւելու համար: Այսպիսով, սկզբնական փուլերում հնարավոր է հայտնաբերել ինսուլտի հակվածությունը»,- ամփոփել է մասնագետը։