Մարտի 5-ին Իրանի Իսլամական Հանրապետության զինված ուժերը անօդաչու թռչող սարքերով հարձակումներ են իրականացրել Ադրբեջանի Նախիջևանի միջազգային օդանավակայանի և քաղաքացիական ենթակառուցվածքների վրա։ Ադրբեջանի պաշտպանության նախարարությունը խստորեն դատապարտել է այս գործողությունները՝ ընդգծելով, որ դրանք կատարվել են առանց որևէ ռազմական անհրաժեշտության։ Նախիջևանի օդանավակայանի տերմինալը վնասվել է, իսկ հարձակման հետևանքով երկու քաղաքացիական անձ է տուժել։
Պաշտոնական հայտարարության մեջ նշվում է, որ Իրանի զինված ուժերի կողմից իրականացված հարձակումների ամբողջ պատասխանատվությունը դրվում է Թեհրանի վրա։ Ադրբեջանի ՊՆ-ն հայտարարել է, որ ուսումնասիրում է անօդաչու թռչող սարքերի տեխնիկական տվյալները և հարձակումների մանրամասները, և պատրաստում է անհրաժեշտ պատասխան միջոցներ՝ երկրի տարածքային ամբողջականությունն ու ինքնիշխանությունը պաշտպանելու, ինչպես նաև քաղաքացիական բնակչության և ենթակառուցվածքների անվտանգությունը ապահովելու համար։