Իռլանդիայի Էներգետիկայի կարգավորման հանձնաժողովի (CRU) հրապարակած վերջին տվյալների համաձայն՝ երկրում ավելի քան 500,000 տնային տնտեսություն ունի էներգակիրների վճարման պարտքեր: Ինչպես հաղորդում է «Irish Examiner»-ը, 318,735 տնային տնտեսություն ունի էլեկտրաէներգիայի առնվազն 30 օրվա պարտք, իսկ 183,000-ը՝ գազի վճարման հետ կապված խնդիրներ:
Հունիսի 11-ին խորհրդարանում (Դեյլ) տեղի ունեցած քննարկումների ժամանակ ընդդիմադիր ուժերը, մասնավորապես «Շին Ֆեյն» կուսակցությունը, կտրուկ քննադատության են ենթարկել կառավարության քաղաքականությունը: Ընդդիմության ներկայացուցիչ Փիրս Դոհերթին նշել է, որ սա առաջին դեպքն է, երբ պարտքերի ծավալը հասնում է նման ցուցանիշի՝ կոչ անելով վերականգնել էներգետիկ սուբսիդիաները, որոնք չեղարկվել էին նախորդ բյուջեի ընդունման ժամանակ:
Կառավարության անունից ելույթ ունեցող Ձեռնարկատիրության նախարար Փիթեր Բերքը պաշտպանել է գործող ռազմավարությունը՝ նշելով, որ իշխանությունները շարունակում են աջակցել քաղաքացիներին վառելիքի ակցիզային հարկերի կրճատման, վառելիքային նպաստների ավելացման և էներգետիկ ընկերությունների հետ սերտ համագործակցության միջոցով: Նախարարը շեշտել է, որ հատուկ ուշադրություն է դարձվում սպառողների պաշտպանությանը՝ էներգամատակարարումից կտրվելու դեպքերը բացառելու նպատակով:
Թեև կառավարությունը հայտարարում է, որ իր տրամադրության տակ եղած ռեսուրսները կուղղվեն նպատակային աջակցությանը, ընդդիմությունը պնդում է, որ գնաճի և կենսապահովման ծախսերի աճի պայմաններում ընթացիկ միջոցառումները բավարար չեն, և հազարավոր ընտանիքներ հայտնվել են ծանր ֆինանսական դրության մեջ: