Ճապոնիայի իշխանությունները երկրում գտնվող զբոսաշրջիկներին զգուշացրել են «Հագիբիս» թայֆունի մոտենալու մասին: Այս մասին տեղեկացնում է Ճապոնիայի Հանրային հեռուստատեսությունը։
Ինչպես փոխանցում է աղբյուրը, զբոսաշրջիկներին թայֆունի մասին օտար լեզուներով անհրաժեշտ տեղեկություններ է տրամադրում շուրջօրյա գործող թեժ գիծը: Արտերկրից ժամանած հյուրերի համար իրազեկումն իրականացվում է նաև հավելվածի միջոցով, որը գործում է սոցիալական ցանցերում՝ օտար լեզուներով:
Ճապոնիայում այժմ օտարերկրյա զբոսաշրջիկների թիվը զգալիորեն գերազանցում է միջին ցուցանիշը տարվա այս ժամանակահատվածի համար։ Պատճառը երկրում անցկացվող Ռեգբիի Աշխարհի գավաթի խաղարկությունն է:
«Հագիբիս» թայֆունի մոտենալու պատճառով ճապոնական ավիաընկերությունները որոշել են չեղարկել հոկտեմբերի 12-ին նախատեսված մոտ 800 ներքին չվերթ: Միաժամանակ, երկաթուղային JR օպերատորը շաբաթ որոշել է նվազեցնել Տոկիոյից Օսակա ուղղությամբ գնացքների երթևեկը, իսկ կեսօրից հետո ամբողջությամբ դադարեցնել: Անվտանգության նկատառումներից ելնելով՝ փակ են լինելու նաև Խաղաղ օվկիանոսի ափամերձ ավտոճանապարհները: