Վեդու համայնքապետարանում նոյեմբերի 19-ին տեղի ունեցած ավագանու նիստը լարված մթնոլորտում է անցել: Նիստի օրակարգում քննարկվում էր «Օրդ Գրուպ» ՍՊԸ-ի կողմից ներկայացված Կարմիր սարի կրաքարային մերգելների օգտակար հանածոյի արդյունահանման հարցը: Ավագանու քվեարկությունից կախված էր, թե արդյոք ընկերությունը կստանա շրջակա միջավայրի վրա ազդեցության ուսումնասիրություն իրականացնելու իրավունք:
Կարմիր սարը գտնվում է Արարատյան դաշտի գյուղատնտեսական գոտում և համարվում է կենսաբազմազանության եզակի գանձարան: Այն Կարմիր գրքում գրանցված 14 տեսակ բույսերի աճելավայր և 16 տեսակ կենդանիների ապրելավայր է: Տարածքի բնապահպանական արժեքը մեծ է, ինչը մտահոգություն է առաջացրել տեղի բնակիչների և բնապահպանների շրջանում:
Չնայած նիստը հայտարարվել էր դռնբաց, սակայն ոստիկանները և համայնքապետարանի աշխատակիցները թույլ չէին տալիս ներս մտնել նույնիսկ նախապես գրանցված անձանց: Ոստիկանները պատճառաբանում էին, որ ներսում տեղ չկա, սակայն ներկաները պնդում էին, որ դա իրականությանը չի համապատասխանում: Հասարակական գործիչ Արթուր Չախոյանը և նրա երկու ընկերները նույնպես փորձել են մասնակցել նիստին, սակայն նրանց մուտքը սկզբում արգելվել է:
Նիստին մասնակցելու համար Վեդու համայնքապետարան էին եկել նաև այլ քաղաքացիներ, այդ թվում՝ Գինեվետ գյուղի բնակիչներ և բնապահպաններ, որոնք նույնպես բողոքում էին հանքի բացման հնարավորությունից: Գյուղացիները նշում էին, որ հանքը վնասելու է գյուղատնտեսական տարածքներին, աղտոտելու է օդը և բացասաբար ազդելու է բնակչության առողջության վրա: Նրանք ընդգծում էին, որ Արարատի մարզը հայտնի է իր գյուղատնտեսական արտադրությամբ, և նման հանքերի շահագործումը կարող է լրջորեն վնասել տարածաշրջանի տնտեսական և բնապահպանական վիճակին: