PlayStation.Blog-ը պաշտոնապես հայտարարել է Stuntman: Hollywood նոր խաղի մասին, որը նախատեսված է PlayStation 5 հարթակի համար: Ի տարբերություն ավանդական մրցարշավային խաղերի, այս նախագիծը կենտրոնանում է հնարքների կատարողի՝ ստանտմենի դերի վրա: Խաղացողները պետք է իրականացնեն բարդ հնարքներ, որոնք ոգեշնչված են Universal-ի հայտնի ֆիլմաշարերով, այդ թվում՝ «Ֆորսաժ» (Fast and Furious) ֆրանշիզայով:
Ըստ հրապարակված տեղեկատվության՝ խաղի հիմնական շեշտադրումը ոչ թե մրցարշավն է, այլ կինոարտադրության գործընթացը: Խաղացողները պետք է կատարեն տարբեր հնարքներ՝ դրիֆտ, խոչընդոտների հաղթահարում և բարձր արագությամբ ճշգրիտ վարում՝ վիրտուալ ռեժիսորի պահանջներին համապատասխան: Խաղը կառուցված է էպիզոդիկ սկզբունքով, որտեղ հաջողությունը կախված է նրանից, թե որքան ճշգրիտ կկատարվեն հնարքները նկարահանման հրապարակում:
Բացի «Ֆորսաժ»-ից, խաղում ներառված են նաև այլ հայտնի նախագծեր, ինչպիսիք են՝ «Հետ դեպի ապագա» (Back to the Future), «Knight Rider», «Miami Vice» և «Death Race» ֆիլմերը: Խաղացողներին հասանելի կլինեն տարբեր տրանսպորտային միջոցներ՝ ավտոմեքենաներից մինչև մոտոցիկլետներ և ավտոբուսներ: Թեև խաղն օգտագործում է արկադային ֆիզիկա, մշակողները շեշտում են, որ հիմնական նպատակը հոլիվուդյան նկարահանումների մթնոլորտը և քաոսը վերստեղծելն է: PlayStation-ը դեռևս չի հայտարարել խաղի թողարկման հստակ ամսաթիվը: