Վաշինգտոնի Լինքոլնի հուշահամալիրի «Հայելային» լողավազանի (Reflecting Pool) 14.7 միլիոն դոլար արժողությամբ վերանորոգումը հայտնվել է լուրջ քննադատության կիզակետում։ Նոր տեղադրված կապույտ պոլիմերային թաղանթը սկսել է պոկվել, ինչը հանգեցրել է կառավարության և փորձագետների միջև սուր հակասությունների։
ԱՄՆ նախագահ Դոնալդ Թրամփը կատարվածի համար մեղադրում է վանդալներին՝ պնդելով, որ թաղանթի վրա առկա մոտ 300 ոտնաչափ (մոտ 90 մետր) կտրվածքները արվել են սուր գործիքներով։ ԱՄՆ Ներքին գործերի նախարարությունը և Ազգային պարկերի ծառայությունը (NPS) հաստատել են, որ դատական փաստաթղթերում նշվում է վանդալիզմի մասին՝ ներառյալ ցանկապատի ձողերի նետումը լողավազան։
Սակայն, ըստ մասնագետների, խնդիրը կարող է ունենալ ոչ թե քրեական, այլ տեխնիկական բնույթ։ Ջրային համակարգերի և ջրամեկուսացման փորձագետները նշում են, որ թաղանթի պոկվելը կարող է պայմանավորված լինել մակերեսի սխալ նախապատրաստմամբ կամ ջրի քիմիական կազմով։ Բացի այդ, NPS-ի կողմից ջրիմուռների դեմ օգտագործված ջրածնի պերօքսիդը կարող է արագացրած լինել թաղանթի քայքայումը։
Թաֆթսի համալսարանի պրոֆեսոր Սթիվեն Չապրան ընդգծել է, որ լողավազանի կառուցվածքը՝ առանց ջրի շրջանառության և ստվերի, ինքնին նպաստում է ջրիմուռների աճին, հատկապես մուգ կապույտ հատակի դեպքում, որը ջերմություն է կլանում։ Փորձագետները կարծում են, որ վանդալիզմի վարկածը չի բացատրում ինժեներական այն խնդիրները, որոնք ի հայտ են եկել վերանորոգումից անմիջապես հետո։
Atlantic Industrial Coatings ընկերության հետ կնքված առանց մրցույթի պայմանագիրը այժմ հայտնվել է հանրային ուշադրության կենտրոնում։ NPS-ը պլանավորում է հուլիսի 4-ի տոնակատարություններից հետո դատարկել լողավազանը՝ վնասի իրական պատճառները պարզելու և բետոնե հիմքի վիճակը գնահատելու համար։