ՀՖՖ նախագահի, գործկոմի անդամների շրջանառվող թեկնածուների շարքում նշվում են նաև Legal Sport ֆուտբոլային գործակալության հիմնադիր, անվանի ֆուտբոլային գործակալ Խորեն Քալաշյանի և գործակալության գործադիր տնօրեն, Հայաստանի հավաքականի և մի շարք ակումբների նախկին անվանի ֆուտբոլիստ Կարեն Դոխոյանի անունները:
2017 թվականից գործունեություն ծավալող Հայաստանում ֆուտբոլային առաջին գործակալության՝ Legal Sport-ի ղեկավար կազմն անմասն չի մնում հայկական ֆուտբոլում ծավալվող իրադարձություններից։ Վերջերս Legal Sport-ը նաև հայտարարություն էր տարածել:
Խորեն Քալաշյանը ArmSport.am-ի հետ զրույցում ներկայացրել է գործակալության տեսակետը և մոտեցումները ՀՖՖ առաջիկա լայնածավալ զարգացումների շեմին.
Առաջիկա ընտրություններին Legal Sport-ի, այսպես ասած, «մասնակցության» ձևաչափի մասին Խորեն Քալաշյանի տեսակետը համընկնում է հայկական ֆուտբոլի մասին շահագրգիր կողմերի մոտեցմանը, այն է հանրային քննարկման միջոցով համաձայնության հասնել.
«Առաջին հերթին փորձ ենք անելու շահագրգիռ կողմերին և թեկնածուներին բերել հանրային քննարկման բաց դաշտ` ծանոթանալու նրանց զարգացման տեսլականին և ներկայացնելու մերը: Այդ քննարկումները կթելադրեն մեր հետագա անելիքները»։
Ինչպես հայտնի է, ՀՖՖ նախագահի կամ Գործկոմի անդամի թեկնածու կարող են առաջադրել ՀՖՖ-ում ընդգրկված հասարակական կազմակերպությունները, որոնց մեծ մասը կազմում են ակումբները: Իրադարձությունների այնպիսի զարգացման դեպքում, եթե Legal Sport-ի անդամները որոշեն մասնակցել ընտրություններին, ապա անհրաժեշտ է, որպեսզի տվյալ անդամը լինի որևէ ՀԿ-ի թեկնածուն: Քալաշյանը նշեց, որ գործակալությունը դեռևս իր դիրքորոշումը հստակ չի հայտնել, ուստի դեռևս վաղ է խոսել այդ մասին:
Ամեն դեպքում, որպես հայկական ֆուտբոլում ծավալուն գործունեություն կատարող սուբյեկտ՝ Legal Sport-ի թիմը չի կարող անմասն մնալ կատարվողից: Քալաշյանը համաձայնեց, որ հայկական ֆուտբոլին նվիրված անձինք, կազմակերպությունները չեն կարող լուռ հետևել այս ամենին.
«Որպես ֆուտբոլային սուբյեկտ, որտեղ հավաքված են ֆուտբոլային գիտելիքներ և փորձ ունեցող մարդիկ, այսօրվա վակումում, կողքից հետևելը մի տեսակ ազնիվ էլ չէ, ճիշտ չէ։ Իսկ բիզնեսի տեսանկյունից հայկական ֆուտբոլի զարգացումը ուղիղ համեմատական է մեր գործակալության հաջողություններին»:
ՀՖՖ-ում ՀԿ-ների ներկայությունը գրեթե բոլորին մտահոգող հարց է: Վերջին շրջանում որոշ ՀԿ-ներ ձեռք են բերել «ֆեյք» պիտակը: Այն հարցին, թե արդյո՞ք պատրաստ են առաջարկի դեպքում համագործակցել ՀԿ-ների հետ, Խորենի պատասխանը հեգնական էր. «Ո՞ր ՀԿ-ների մասին է խոսքը. այն, որ 1-1.5 տարվա ընթացքում ՀՖՖ-ն և գործկոմը այդպես էլ չբացահայտեցի՞ն…»։
Իրավիճակ է ստեղծվել, երբ հարկավոր է հայկական ֆուտբոլով մտահոգ անձանց համախմբվածությունը: Քալաշյանի պնդմամբ իրենք հենց նրանց կողքին են լինելու.
«Լինելու ենք բոլոր նրանց կողքին, ովքեր իրենց փորձով և գիտելիքներով կարող են աջակցել հայկական ֆուտբոլի զարգացմանը, բայցև միևնույն ժամանակ շարքային ֆուտբոլային «մուտիլովշիկներ» չեն»։
Հիշեցնենք, որ Legal Sport-ը Ռուսաստանում գործող հայտնի գործակալություն է: 2017 թվականին Խորեն Քալաշյանը հիմնել է երևանյան մասնաճյուղը, որը մեր երկրում տեսակի մեջ առաջինն է և դեռևս միակը: Գործակալության հաճախորդներ են «Արարատ-Արմենիայի» գլխավոր մարզիչ Վարդան Մինասյանը, Հայաստանի ազգային հավաքականի ֆուտբոլիստներ Գևորգ Ղազարյանը, Էրիկ Վարդանյանը, Անատոլի Այվազովը, տարբեր տարիքային հավաքականի առաջատար ֆուտբոլիստներ Հովհաննես Հարությունյանը, Արմեն Հովհաննիսյանը, Էրիկ Ազիզյանը և այլք: Գործակալության հաճախորդներ են նաև արտասահմանցի ֆուտբոլիստներ մարոկկական արմատներով հոլանդացի Օթման Էլ Կաբիրը («Ուրալ»), լիտվացի Օվիդիուս Վերբիցկասը («Սուդուվա») և Դոնատաս Կոնիկասը («Պալանգա»), ռուս Միխայիլ Կիզեևը («Զենիթ-2») և այլք:
Գործակալությունը կազմակերպել էր նաև ֆուտբոլային գործակալների դասընթացներ, որին մասնակցում էր նախկին ֆուտբոլիստ, Ռուսաստանում մեծ ճանաչում ունեցող Անդրեյ Մովսեսյանը:
Գրում է ArmSport.am-ը։
ԽՈՐՀՈւՐԴ Է ՏՐՎՈւՄ ԿԱՐԴԱԼ
