ԱՄՆ-ի հակահրթիռային պաշտպանության համակարգը հայտնվել է աննախադեպ ճնշման տակ։ Պենտագոնի ներքին զեկույցների համաձայն՝ «Մռնչացող առյուծ» գործողության ընթացքում ԱՄՆ-ն Իսրայելը պաշտպանելու համար օգտագործել է ավելի քան 200 THAAD որսիչ հրթիռ, ինչը կազմում է երկրի ընդհանուր պաշարների մոտ 50%-ը։ Միևնույն ժամանակ, Իսրայելը խնայել է սեփական առաջնակարգ հրթիռները՝ օգտագործելով ընդամենը 100 Arrow և 90 David’s Sling համակարգեր։ Այս դիսբալանսը լուրջ մտահոգություններ է առաջացրել Վաշինգտոնում՝ կապված այլ տարածաշրջաններում, հատկապես Ասիա-խաղաղօվկիանոսյան գոտում, ԱՄՆ-ի մարտունակության հետ։
Իրավիճակը բարդանում է նրանով, որ ամերիկյան ռազմարդյունաբերական համալիրը չի հասցնում լրացնել սպառված պաշարները։ Փորձագետները նշում են, որ Ճապոնիան և Հարավային Կորեան, որոնք ապավինում են ամերիկյան հակահրթիռային վահանին՝ Չինաստանի և Հյուսիսային Կորեայի սպառնալիքներից պաշտպանվելու համար, կարող են հայտնվել խոցելի վիճակում։ Մինչդեռ Իրանը, չնայած կրած կորուստներին, պահպանել է իր հրթիռային ներուժի շուրջ 70%-ը, ինչը նշանակում է, որ հակամարտության հնարավոր վերսկսումը կարող է վերջնականապես սպառել ամերիկյան արսենալը։
Այս ճգնաժամի ֆոնին ԱՄՆ-ն արագացնում է հիպերձայնային տեխնոլոգիաների փորձարկումները։ Stratolaunch ընկերությունը՝ Հակահրթիռային պաշտպանության գործակալության հետ համատեղ, իրականացրել է Talon-A3 հիպերձայնային սարքի հաջող փորձարկումը։ Սա ռազմավարական քայլ է՝ ուղղված ապագա սպառնալիքներին դիմակայելուն, քանի որ ներկայիս ստատիկ համակարգերը դառնում են տնտեսապես և լոգիստիկ առումով ոչ արդյունավետ՝ զանգվածային հրթիռային հարձակումների պայմաններում։