Նախիջևանի Ինքնավար Հանրապետության Սահմանադրության նախաբանը փոփոխվում է, և սահմանադրությունից հանվում են Մոսկվայի և Կարսի պայմանագրերի անվանումները։ Սա արտացոլված է Ադրբեջանի Հանրապետության «Նախիջևանի Ինքնավար Հանրապետության Սահմանադրության մեջ փոփոխություններ կատարելու մասին» սահմանադրական օրենքի նախագծում, որը ներկայացվել է Միլլի Մեջլիսի այսօրվա նիստում՝ երկրորդ ընթերցմամբ քննարկման։ Նոր տարբերակում նշվում է, որ Նախիջևանի Ինքնավար Հանրապետությունն Ադրբեջանի Հանրապետության անբաժանելի մասն է։
Նախիջևանի գործող Սահմանադրությունը հիմնված է 1991 թվականի «Ադրբեջանի Հանրապետության պետական անկախության վերականգնման մասին» հռչակագրի և 1995 թվականի հանրաքվեով ընդունված Ադրբեջանի Հանրապետության Սահմանադրության սկզբունքների վրա։
Սահմանադրական օրենքի նախագիծը նախատեսում է նաև Նախիջևանի Սահմանադրությունում ավելացնել երկու նոր հոդված (հոդված 3-1 և հոդված 28-1), մեկ հոդվածի (հոդված 5) բացառում, ինչպես նաև մի շարք հոդվածներում և նախաբանում փոփոխություններ կատարել։ Նախագծի համաձայն, Նախիջևանի Ինքնավար Հանրապետությունը Ադրբեջանի Հանրապետության անբաժանելի մասը համարող դրույթը, ինչպես նշված է Ադրբեջանի Սահմանադրության 134-րդ հոդվածի երրորդ մասում, նույնպես կարտացոլվի Նախիջևանի Ինքնավար Հանրապետության Սահմանադրության նախաբանում։
Առաջարկվող 3-1 հոդվածը սահմանում է, որ Նախիջևանի Ինքնավար Հանրապետությունում Ադրբեջանի նախագահի լիազոր ներկայացուցչությունը գործադիր մարմին է, որը կատարում է նախագահի կողմից սահմանված պարտականությունները։
Նախագծում առաջարկվող մեկ այլ փոփոխություն է 28-1 հոդվածը՝ «Նախիջևանի Ինքնավար Հանրապետության Գերագույն Մեջլիսի լուծարումը» անվամբ։ Այս հոդվածը նախատեսում է Նախիջևանի Ինքնավար Հանրապետության Գերագույն Մեջլիսի լուծարում Ադրբեջանի նախագահի կողմից՝ 31 պատգամավորների խնդրանքով կամ այն դեպքում, երբ Գերագույն Մեջլիսը չի կարողանում կատարել իր պարտականությունները՝ այնպիսի պատճառներով, որոնք չեն կարող վերացվել և նշված են Սահմանադրության համապատասխան հոդվածներում։
Այս փոփոխությունները, որոնք ընդունվել են երկրորդ ընթերցմամբ, նպատակ ունեն ամրապնդել Ադրբեջանի վերահսկողությունը Նախիջևանի նկատմամբ։