Նոր Զելանդիան դիտարկում է Ավստրալիա-Ֆիջի պաշտպանական դաշինքին միանալու հնարավորությունը

Նոր Զելանդիայի կառավարությունը պաշտոնապես դիտարկում է «Խաղաղ օվկիանոս» (Ocean of Peace Alliance) պաշտպանական դաշինքին միանալու հնարավորությունը, որը ստեղծվել է Ավստրալիայի և Ֆիջիի կողմից այս շաբաթ։ Ինչպես հաղորդում է Reuters-ը, վարչապետ Քրիստոֆեր Լաքսոնը հինգշաբթի օրը հաստատել է, որ երկիրը սկսել է քննարկումները գործընկերների հետ։ Ավստրալիայի և Ֆիջիի միջև երկուշաբթի օրը ստորագրված համաձայնագիրը պարտավորեցնում է կողմերին ռազմական օգնություն ցուցաբերել միմյանց հարձակման դեպքում։ Սա Ֆիջիի պատմության մեջ առաջին պաշտոնական պաշտպանական դաշինքն է, որը նրան դարձնում է Ավստրալիայի չորրորդ պաշտոնական դաշնակիցը՝ ԱՄՆ-ից, Նոր Զելանդիայից և Պապուա Նոր Գվինեայից հետո։ Նոր Զելանդիայի արտաքին գործերի նախարար Ուինսթոն Փիթերսը նշել է, որ այս քայլը համահունչ է խաղաղօվկիանոսյան տարածաշրջանի անվտանգության մարտահրավերներին արձագանքելու՝ տարածաշրջանի առաջնորդների վաղեմի դիրքորոշմանը։ «Ավստրալիայի և Ֆիջիի հետ մեր երկարամյա հարաբերությունները դաշինքի մակարդակի բարձրացնելը կնշանակի ավելի սերտ գործընկերություն», – ասել է Փիթերսը։ Ներկայումս Նոր Զելանդիան ունի միայն մեկ պաշտոնական ռազմական դաշնակից՝ Ավստրալիան, թեև այն հանդիսանում է Five Eyes հետախուզական ցանցի անդամ և ՆԱՏՕ-ի առանցքային գործընկեր։ Պայմանագրին միանալու վերջնական որոշումը կկայացնի Նոր Զելանդիայի կառավարությունը։ Այս նախաձեռնությունը հաջորդել է տարածաշրջանում աճող լարվածությանը, մասնավորապես՝ երկուշաբթի օրը Խաղաղ օվկիանոսում Չինաստանի կողմից միջուկային սուզանավից հրթիռի փորձարկմանը։