Kering-ը և Gucci-ն հայտնել են իտալական ապրանքանիշի նոր ստեղծագործական տնօրենի՝ Սաբադո դե Սարնոյի անունը։ Այս պաշտոնում նա փոխարինել է Ալեսանդրո Միքելեին, ով պաշտոնը լքել էր անցյալ տարվա նոյեմբերին։ Այդ մասին գրում է WWD-ն։
Դե Սարնոյի առաջին ցուցադրությունը տեղի կունենա սեպտեմբերին՝ Միլանի նորաձևության շաբաթվա ընթացքում։ Դիզայները կենթարկվի ապրանքանիշի նախագահ և գործադիր տնօրեն Մարկո Բիզարիին:
«Ես ուրախ եմ, որ Սաբատոն կմիանա Gucci-ին որպես տան նոր ստեղծագործական տնօրեն: Աշխատելով Իտալիայի ամենահայտնի շքեղ նորաձևության տների հետ՝ նա բերում է լայն և արդի փորձ: Խորը հասկանալով Gucci-ի յուրահատուկ ժառանգությունը և գիտակցելով դրա նշանակությունը՝ ես վստահ եմ, որ Սաբատոն կղեկավարի մեր թիմերը և կառաջնորդի նրանց հստակ տեսլականով, որը կօգնի գրել այս հետաքրքիր հաջորդ գլուխը՝ հիմնվելով տան հեղինակության վրա ու օգտագործելու նրա հարուստ ժառանգությունը», – Բիզարին մեկնաբանել է նշանակումը։
Դե Սարնոն մեծացել է Նեապոլում։ Դիզայներն իր կարիերան սկսել է Prada-ում 2005 թվականին, այնուհետև տեղափոխվել է Dolce & Gabbana, իսկ 2009 թվականին միացել է Valentino-ին, որտեղ ի վերջո զբաղեցրել է տղամարդկանց և կանանց հավաքածուների դիզայնի տնօրենի պաշտոնը։
«Ինձ համար պատիվ է ստանձնել Gucci-ի ստեղծագործական տնօրենի դերը: Ես հպարտ եմ, որ միացել եմ նման արտասովոր պատմություն և ժառանգություն ունեցող տանը: Ես հուզված և ոգևորված եմ՝ կիսվելու ապրանքանիշի վերաբերյալ իմ ստեղծագործական տեսլականով»,- ասել է Դե Սառնոն:
