Հնդկաստանի մայրաքաղաք Նյու Դելիի բնակիչները արդեն չորրորդ օրն է՝ շարունակում են շնչահեղձ լինել թունավոր սմոգից, որը հայտնվել է նոյեմբերի 8-ի առավոտյան՝ հնդկական Դիվալի փառատոնի տոնակատարությունից հետո: Այս մասին հաղորդում է Reuters-ը:
Օդի աղտոտվածության մակարդակը գերազանցել է 400 միկրոգրամը: Օդերևութաբանները չեն խոստանում, որ մոտակա օրերին Նյու Դելիում կտեղա ուժեղ անձրև, կամ տեղի կունենա քամու ուժեղացում, ինչը կմաքրեր օդը:
Իրավիճակը փոքր-ինչ բարելավելու համար իշխանությունները մինչև երկուշաբթի արգելել են քաղաքում բոլոր շինարարական աշխատանքները և ծանր բեռնատար տրանսպորտի երթևեկությունը: Բնակչությանը խորհուրդ է տրվում կրել շնչադիմակներ, իսկ վարորդներին՝ հրաժարվել ավտոմեքենաներ վարելուց: