Ամերիկայի Միացյալ Նահանգների պետդեպարտամենտի մամուլի խոսնակ Նեդ Փրայսը հայտարարություն է տարածել՝ Հայաստանում արտահերթ խորհրդարանական ընտրությունների արդյունքների վերաբերյալ։
Նա նշել է, որ ԱՄՆ շնորհավորում է հայ ժողովրդին՝ խորհրդարանական ընտրությունների կապակցությամբ։ Նրա խոսքով՝ դիտորդական առաքելությունների գնահատականներով՝ չեն խախտվել մարդու իրավունքներն ու հիմնարար ազատությունները, ընտրապայքարում մասնակիցները հնարավորություն են ունեցել ազատ քարոզչություն անկացնել, ինչպես նաև դրական է ընթացել ձայների հաշվարկը։
Փրայսը կոչ է արել ընդունել ընտրությունների արդյունքներն ու դրանք բողոքարկել օրինական ճանապարհով և խուսափել քաղաքական հաշվեհարդարներից, քանի որ Հայաստանը շարունակում է ընթանալ դեպի ինքնիշխան, ժողովրդավար, խաղաղ և բարեկեցիկ ապագա։
Նշվում է, որ ԱՄՆ-ն հույս ունի համագործակցել նոր կառավարության հետ՝ երկկողմ հարաբերությունների ու համագործակցության զարգացման համար։
