Կատալոնիայի անջատականների առաջնորդ, Բելգիայում ապաստանած Կարլես Պուչդեմոնն այսօր Բրյուսելում կամավոր ներկայացել է ոստիկանություն այն բանից հետո, երբ Իսպանիան արձակել է նրան ձերբակալելու նոր միջազգային հրամանագիր:
Ինչպես հայտնում են առաջնորդի գրասենյակից, Պուչդեմոնը ոստիկանություն է ներկայացել փաստաբանների ուղեկցությամբ:
Պուչդեմոնը կտրականապես դեմ է իր արտահանձնմանը Իսպանիա: Առայժմ հայտնի չէ, թե ինչ որոշում կկայացնեն Բելգիայի իրավապահները:
Մինչդեռ, Կատալոնիայի մայրաքաղաք Բարսելոնայում շարունակվում են բողոքի զանգվածային ակցիաները:
Կատալոնացիները պահանջում են ազատ արձակել անջատողական գործունեության համար Իսպանիայի Գերագույն դատարանի վճռով ազատազրկման դատապարտված լիդերներին: