Սեպտեմբերի 14-ին Երևանի ավագանու նիստում օրակարգի հարցը ներկայացնելիս քաղաքապետի տեղակալ Սերգեյ Ներսիսյանը ասաց, որ պարգևավճարների ֆոնդը սահմանել են 100 մլն դրամ, իսկ մնացած գումարը տեղափոխվել է աշխատավարձերի ծախսային մաս:
Օրակարգի այդ հարցը վերաբերում է Երևան քաղաքի ավագանու 2020 թվականի դեկտեմբերի 23-ի N310-Ն որոշման մեջ փոփոխություններ կատարելուն։
Նշենք, որ այս որոշմամբ առաջարկվում է «Կառավարման մարմնի պահպանում» ծրագրում բյուջետային ծախսերի տնտեսագիտական դասակարգման «Աշխատողների աշխատավարձեր և հավելավճարներ» հոդվածը ավելացնել 832,074.8 հազ. դրամով, ինչպես նաև պահուստային ֆոնդի վարչական մասը համալրել 28,880.4 հազ. դրամով՝ «Կառավարման մարմնի պահպանում» ծրագրի «Պարգևատրումներ, դրամական խրախուսումներ և հատուկ վճարներ» հոդվածը նվազեցնելով 860,955.2 հազ. դրամով:
Քվեարկության՝ 37 կողմ, 0 դեմ, 0 ձեռնպահ արդյունքներով որոշումն ընդունվեց։