Քաղաքապետարանը գաղտնի նվերներ չի ընդունել որևէ մեկից։ Այս մասին այսօր՝ նոյեմբերի 26-ին, լրագրողների հետ զրույցում ասաց Երևանի քաղաքապետարանի մամուլի քարտուղար Հակոբ Կարապետյանը։
Նշենք, որ ավագանու «Լույս» խնբակցությունը հայտնել էր, թե քաղաքապետարանը Սամվել Ալեքսանյանից բեռնատարներ է նվեր ստացել և գաղտնի է պահել հանրությունից։
«Այդ տեղեկությունն իրականությանը չի համապատասխանում։ Եթե պարոն Ալեքսանյանը կամ որևէ գործարար ապագայում կորոշի օժանդակել քաղաքային իշխանությանը, քաղաքը միայն շնորհակալ կլինի դրանից։ Բիզնեսի սոցիալական պատասխանատվության ինստիտուտը ՄԱԿ-ի հռչակագրով ընդունված լայնորեն կիրառելի պրակտիկա է, և քաղաքային իշխանությունը ողջունում է դա։ Եթե բիզնեսը վստահում է քաղաքային իշխանությանը, եթե անհատը կամ կազմակերպությունը ուզում է համայնքին կամ քաղաքին նպաստ բերել այդ նվիրատվությամբ, մենք դա ողջունում ենք»,-նշեց նա։
Հակոբ Կարապետյանն ընդգծեց, որ քաղաքային իշխանությունը նվերների դիմաց որևէ պարտավորություն կամ արտոնություն բիզնեսին չի տրամադրում։
«Լույս» խմբակցության պնդմանը, թե նվերները պետք է ավագանու որոշմամբ ընդունվեր, Կարապետյանն ասաց, որ ՏԻՄ օրենքի համաձայն՝ ոչ բոլոր դեպքերում է, որ ավագանու որոշումը պարտադիր է։
Կարապետյանը չհերքեց, որ կան անհատներ և գործարարներ, որոնք նվիրատվություն արել են քաղաքապետարանին, սակայն անուններ չնշեց։
«Հասկանալի է, որ կա նվիրատվություն, որի մասին մենք խոսել ենք, դրանք ոչ միայն աղբատարներներ են, այլ նաև շինտեխնիկա, ձնամաքրող տեխնիկա, որոշ դեպքերում բնակմակերես և այլն»,-ասաց նա։
Մամուլի խոսնակն ասաց, որ առաջիկայում նվերներ կատարած անձանց և ընկերություններին քաղաքապետը շնորհակալագրեր է հանձնելու։