«Կրկնակի անմահություն» ֆիլմը ներկայացնում է Միխայիլ Վռուբելի «Դևը և հրեշտակը Թամարի հոգու հետ» նկարի պատմությունը, քսաներկու տարի շարունակ միջազգային հետախուզման մեջ գտնվող գործի Ռուսական արվեստի թանգարան վերադարձին նվիրված միջոցառումների շարքը:
«Արմենպրես»-ի հաղորդմամբ` «Գողացված Վռուբելի վերադարձը» խորագրով ցուցահանդեսի փակման արարողությունը տեղի ունեցավ մարտի 1-ին Ռուսական արվեստի թանգարանում:
«Ցուցահանդեսի շրջանակում կազմակերպվել են մի շարք միջոցառումներ, որոնք Հայաստանի և Ռուսաստանի միջմշակութային համագործակցության լավագույն օրինակ են: Նկարի վերադարձը մեր թանգարան հայ և ռուս ժողովուրդների դարավոր բարեկամության ապացույցն է»,-նշեց թանգարանի տնօրեն Մարինե Մկրտչյանը:
Նա շեշտեց, որ ցուցահանդեսի շնորհիվ թանգարանի այցելուների թիվը մեծացել է: «Դա պայմանավորված է ճիշտ գովազդով, մարքեթինգային քայլերով: Մենք կարողացանք կոտրել տարբեր կարծրատիպեր և արվեստի գործը ներկայացնել նաև ավտոբուսներում: Ըստ իս` դա լավագույն փորձն էր: Պետք է ընդգծեմ, որ նկարի պատմության մասին հոդված է հրատարակվել բրիտանական թանգարանի միջազգային վերապատրաստման դասընթացին նվիրված ժուռնալում»,-պատմեց տնօրենը:
Սամվել Թադևոսյանի ֆիլմի դիտումից, երաժշտական համարներից հետո թանգարանը շնորհակալագրեր հանձնեց 22 կազմակերպությունների, հինգ գլխավոր գործընկերներին էլ նվիրեց Միխայիլ Վռուբելի «Դևը և Հրեշտակը Թամարի հոգու հետ» նկարի կրկնօրինակը:
Ցուցահանդեսը բացվել է 2018 թվականի մարտի 15-ին: Միխայիլ Վռուբելի «Դևը և հրեշտակը Թամարի հոգու հետ» ստեղծագործության վերադարձին նվիրված` ՀՀ մշակույթի նախարարության անմիջական հովանավորությամբ և աջակցությամբ թանգարանն Ալ. Սպենդիարյանի անվան օպերայի և բալետի ազգային ակադեմիական թատրոնում կյանքի է կոչել «Լերմոնտով-Ռուբինշտեյն-Վռուբել» գրական-երաժշտական ներկայացումը, կլոր սեղան, հանդիպում է կազմակերպել Պետական Տրետյակովյան պատկերասրահի վերականգնող Իննա Սոլովովայի հետ, իրականացրել է ցուցահանդես, որը ներկայացնում էր «Դևը և հրեշտակը Թամարի հոգու հետ» գործի ստեղծման պատմությունը և մեր օրերի նրա «ոդիսականը»:
Կտավը ստեղծվել է Միխայիլ Լերմոնտովի մահվան 50-ամյա տարելիցի կապակցությամբ՝ շքեղորեն նկարազարդված երկերի ժողովածուի համար: Գիրքը նկարազարդելու էին հրավիրվել ժամանակի գրեթե բոլոր հայտնի ռուս նկարիչները: Այդ պատվերի շրջանակում Վռուբելը ստեղծել է 36 գծանկար, որոնցից 20-ը ներառվել է հիշյալ հրատարակության մեջ, իսկ դրանցից 11-ը նվիրված էր «Դևը» պոեմին:
Ռուսական «մոդեռնի» նախահայր Միխայիլ Վռուբելի «Դևն ու հրեշտակը Թամարի հոգու հետ» գլուխգործոցը Ռուսական արվեստի թանգարանից գողացվել էր 1995 թվականին:
22 տարի միջազգային հետախուզման մեջ գտնվող նկարը հայտնաբերվեց 2017 թվականի մարտին ռուսական հատուկ ծառայությունների կողմից և նույն թվականի նոյեմբերի 15-ին Մոսկվայում «Ռուսաստանում Հայաստանի օրեր»-ի շրջանակում պետական Տրետյակովյան պատկերասրահի Վռուբելյան դահլիճում ՌԴ նախագահ Վլադիմիր Պուտինի կողմից հանձնվեց ՀՀ Նախագահ Սերժ Սարգսյանին:
Մինչ թանգարան վերադառնալը, բզկտված նկարը Տրետյակովյան պատկերասրահում շուրջ ութ ամիս վերականգնվել է:
