Նոյեմբերին Ուկրաինայի ուղղությամբ ռուսական ուժերի հարվածների թիվը զգալիորեն աճել է։ AFP գործակալության տվյալներով՝ Ռուսաստանը միայն մեկ ամսվա ընթացքում արձակել է 5445 անօդաչու թռչող սարք և 215 հրթիռ։ Հոկտեմբերի համեմատ անօդաչու թռչող սարքերի հարվածներն ավելացել են 3%-ով, իսկ հրթիռների հարվածները՝ 2%-ով։ Դեկտեմբերի 2-ի գիշերը ևս հարվածները շարունակվել են՝ Կրամատորսկում և Օդեսայում պատճառելով զոհեր և վնասներ։
Միևնույն ժամանակ, Սև ծովում լարվածությունը չի նվազում։ Ռուսաստանի նախագահ Վլադիմիր Պուտինը հայտարարել է, որ Մոսկվան կարող է Ուկրաինային կտրել ծովից՝ ի պատասխան լցանավերի վրա հարձակումների։ Նա նաև նշել է, որ կքննարկվեն այն երկրների նավերի դեմ միջոցներ, որոնք աջակցում են Ուկրաինային։ Սև ծովում վերջին օրերին գրանցվել են մի շարք հարձակումներ ռուսական և այլ երկրների նավերի վրա, ինչը խորացնում է տարածաշրջանային լարվածությունը։