Սա մեր կողմից ձեռքսեղմման առաջարկ էր ՍԴ դատավորներին։ Այս մասին այսօր՝ դեկտեմբերի 10–ին, լրագրողների հետ ճեպազրույցում ասաց ԱԺ «Իմ քայլը» խմբակցության ղեկավար Լիլիթ Մակունցը՝ մեկնաբանելով Ազգային ժողովում այսօր առաջին ընթերցմամբ ընդունված ՍԴ դատավորների վաղ կենսաթոշակային համակարգի ներդրման օրենքի նախագծերի փաթեթը։
Մակունցի խոսքով՝ սա կարևոր քայլ է ինստիտուտների կայացման համար և բարեփոխումներ իրականացնելու համար։
«Արդյոք ՍԴ դատավորները կընդունեն, թե ոչ, դա իրենց իրավունքն է։ Սա այն քայլերից մեկն է, որը միտված է բարեփոխումներին և այդ ինստիտուտի կայացմանը։ Շատ եմ կարևորում Արդարադատության նախարարության ռազմավարական փաթեթը, որն իր մեջ ներառում է ոչ միայն գործադիրի կողմից քայլերի շարք, այլև ենթադրում է օրենսդրական նախագծերի ընդունում։
Ավելի շատ կարևորում եմ հենց այդ փաթեթը, որովհետև համապարփակ, խորքային փոփոխությունների համար այն մեծ նշանակություն է ունենալու։ Արդարադատության նախարարությունը հիմա աշխատում է նաև ոստիկանության բարեփոխումների շուրջ, որը նույնպես համարում եմ դրա մի մասը»,-ասաց պատգամավորը։