Արաբ ընդդիմադիր լրագրող Ջեմալ Խաշըգջիի սպանությունից հետո Սաուդյան Արաբիայի արքայազն Մուհամադ բին Սալմանին սկսել են մեղադրել նաև կանանց նկատմամբ բռնությունների, սպառնալիքների ու խոշտանգումների մեջ: Այս մասին մտահոգությունները բարձրաձայնել են բրիտանական խորհրդարանի պատգամավորները:
Այս մեղադրանքները հիմնված են Amnesty International միջազգային իրավապաշտպան կազմակերպության զեկույցի վրա, որում նշվում է կանանց նկատմամբ բռնության 10 արձանագրված դեպքի մասին՝ տանջանքներ, դաժան վերաբերմունք, սեռական ոտնձգություններ, հոսանքահարումով կտտանքներ, ճիպոտով հարվածներ և այլն: Սրան զուգահեռ՝ մայիսից սկսած՝ ձերբակալվել են տասնյակ կանայք, որոնք պայքարել են իրենց իրավունքների պաշտպանության համար:
Կոնկրետ Սաուդյան արքայազնին ուղղված մեղադրանքի հիմքն այն է, որ նրա օգնականը անձամբ ներկա է եղել կանանցից առնվազն մեկի նկատմամբ խոշտանգումներին:
Չնայած սաուդյան կողմի հերքումներին՝ բրիտանական խորհրդարանի անդամները հայտարարել են, որ միջազգային կազմակերպության զեկույցն արժանահավատ է, և կոչ են արել բաց թողնել բանտարկվածներին:
Մուհամադ բին Սալմանը, հիշեցնենք, Սաուդյան Արաբիայի գահաժառանգն է ու թագավորության կենտրոնական իշխանավորներից մեկը: Մինչև վերջերս համարվում էր, որ փաստացի, նա է պետության միանձնյա ղեկավարը, սակայն Խաշըգջիի սպանության հետ կապված աղմուկն ու մեղադրանքները թուլացրին նրա դիրքերը Սաուդյան արքունիքում: