ՀՀ սահմանադրական դատարանը հայտարարություն է տարածել, որը հրապարակվել է ՍԴ-ի Facebook-ի պաշտոնական էջում։
« Ի պատասխան Արդարադատության նախարարի հայտարարության՝ երկու օրից ՍԴ նախագահի լիազորությունների դադարեցման և ևս երեք դատավորի պաշտոնանկ արվելու վերաբերյալ, մենք, ներքոստորոգրյալներս, հայտնում ենք.
Սահմանադրության 167-րդ հոդվածի համաձայն՝ Սահմանադրական դատարանի լիազորությունները սահմանվում են Սահմանադրությամբ, իսկ կազմավորման և գործունեության կարգը` Սահմանադրությամբ և Սահմանադրական դատարանի մասին օրենքով:
«Սահմանադրական դատարանի մասին» սահմանադրական օրենքի 88-րդ հոդվածի 5-րդ մասը սահմանում է, որ մինչև 2015 թվականի փոփոխություններով Սահմանադրության 7-րդ գլխի ուժի մեջ մտնելը նշանակված Սահմանադրական դատարանի նախագահը և անդամները 12 տարվա ժամկետը լրանալուց հետո շարունակում են պաշտոնավարել մինչև իրենց լիազորությունների՝ 2005 թվականի փոփոխություններով Սահմանադրությամբ սահմանված ժամկետի ավարտը:
«Սահմանադրական դատարանի մասին» սահմանադրական օրենքի վերոնշյալ նորմը չի վիճարկվել Սահմանադրական դատարանում, չի ճանաչվել Սահմանադրությանը հակասող, ԱԺ կողմից չի ճանաչվել ուժը կորցրած, ուստի գործող է և ենթակա է կատարման:
Վերոգրյալից ելնելով՝ համապատասխան պաշտոնյաներին հորդորում ենք դուրս չգալ Սահմանադրությամբ և օրենքներով սահմանված լիազորությունների շրջանակից, իրավունքի ու օրինականության ծիրից:
Հ. Թովմասյան
Ա. Գյուլումյան
Ֆ. Թոխյան
Հ. Նազարյան», – ասված է հայտարարությունում։
Հիշեցնենք, որ ավելի վաղ Արդարադատության նախարար Ռուստամ Բադասյանը հայտարարել էր, թե վաղվանից ուժի մեջ կմտնեն Սահմանադրական փոփոխությունները, և արդյունքում պետք է դադարեն ՍԴ նախագահի և ՍԴ երեք անդամի լիազորությունները:
https://www.facebook.com/permalink.php?story_fbid=975514186238729&id=567973740326111&__cft__[0]=AZXonRRWU9qZAbZQOcP6mXRrP51Iym5iSOUg4BgSX4hJi8iLRPd74SxPcbY6dNb_ilQfVdPYvKRD4uMJlfe1V6oH5L25_wP2qPfIRpTnTaeo6k9mgbkzhGmNRFIRzSKGe87bITF8-3MPLkUSw5J92wNTHKnn2qiYvPEj6XzK9NTvFQ&__tn__=%2CO%2CP-R
