Ամերիկացի դերասանուհի Շերոն Սթոունը պատմել է 2001 թվականին տեղի ունեցած առողջապահական ճգնաժամի ընթացքում բժշկական համաձայնության և պացիենտի իրավունքների կոպիտ խախտման մասին՝ նշելով, որ իր նախկին ամուսինն առանց իր իմացության ստորագրել է ուղեղի վիրահատության համաձայնագիր:
Mayim Bialik’s Breakdown փոդքասթի ընթացքում 68-ամյա դերասանուհին հայտնել է, որ ուշքի է եկել պատգարակի վրա, երբ իրեն տեղափոխում էին վիրահատարան: Սթոունը ծանր ենթաոստայնային արյունազեղում և ինսուլտ էր տարել, ինչի հետևանքով նրա ուղեղում արյունահոսությունը տևել էր ինը օր: Ըստ դերասանուհու՝ նրա այն ժամանակվա ամուսինը՝ լրագրող Ֆիլ Բրոնշտեյնը, առանց նրա իմացության կամ համաձայնության ստորագրել էր հետազոտական վիրահատություն իրականացնելու փաստաթղթերը:
Սթոունը պատմել է, որ արթնացել է, երբ պատգարակը բախվել է հատակին գտնվող առարկային, և անմիջապես ընդդիմացել է վիրահատությանը: Չնայած նրա հստակ մերժմանը՝ բժիշկը սկզբում պնդել է շարունակել ընթացակարգը՝ պնդելով, որ բոլոր հարցերը կարգավորված են: Տեղափոխումը կանխելու համար Սթոունը կանգնել է պատգարակի վրա՝ ստիպելով բուժանձնակազմին ուշադրություն դարձնել իրավիճակին: Միջամտությունը կասեցվել է ավագ բուժքրոջ շնորհիվ, ով ճանաչել է պացիենտի ինքնորոշման իրավունքը և կարգադրել դերասանուհուն վերադարձնել հիվանդասենյակ: Բուժքույրն ավելի ուշ նշել է, որ այդ քայլը կարող էր փրկել Սթոունի կյանքը:
Դերասանուհին նաև նշել է, որ Բրոնշտեյնը սկզբում հապաղել է շտապօգնություն կանչել՝ պնդելով, թե Սթոունը ձևացնում է ախտանիշները: Երկարատև ապաքինման ընթացքում դերասանուհին ստիպված է եղել կրկին սովորել քայլել և խոսել: Զույգը վերջնականապես բաժանվել է 2004 թվականին իրենց որդու՝ Ռոանի խնամակալության շուրջ դատական վեճերից հետո: