ԱՄՆ-ում ձնաբքի հետեւանքով զոհվածների թիվը հասել է 85-ի, տեղեկացրել է «Ասոշիեյթեդ պրես» գործակալությունը՝ հղում կատարելով աղետից տուժած նահանգների իշխանությունների ներկայացրած վիճակագրությանը։ Ավելի վաղ տեղեկացվել էր 73 զոհի մասին, սակայն իրավիճակը շարունակաբար վատանում է։ Նշվել է, որ մահերի մոտ կեսը բաժին է ընկել հարավային նահանգներին՝ Թենեսի, Միսիսիպի եւ Լուիզիանա, որոնք սովոր չեն դաժան ձմեռների։
Մահվան դեպքերը, որոնք կապված են վատ եղանակի հետ, տեղի են ունեցել սառչելուց, շմոլ գազի թունավորումներից եւ ավտոմեքենաների, սահնակների եւ ձյուն մաքրող մեքենաների վթարներից։ ԱՄՆ-ում մոլեգնող ձնաբուքն ազդել է ավելի քան 200 միլիոն մարդու վրա, իսկ հազարավոր չվերթներ են չեղարկվել։ Այս իրավիճակը ստեղծել է մեծ խնդիրներ, հատկապես այն բնակիչների համար, ովքեր մնացել են առանց էլեկտրաէներգիայի։