Հարավկորեացի ուսանողները ձերբակալվել են ամերիկյան ավիաբազա ներխուժելու համար

ՍԵՈՒԼ (Azat TV) – Հարավային Կորեայում ոստիկանությունը ձերբակալել է ութ ուսանողի, որոնք, ըստ պաշտոնական տվյալների, երեքշաբթի օրը փորձել են ներխուժել ամերիկյան «Օսան» ավիաբազա։ Ինչպես հայտնում են իրավապահ մարմինները, չորս տղա և չորս աղջիկ ձերբակալվել են ԱՄՆ ռազմական անձնակազմի կողմից և հետագայում հանձնվել են տեղի իշխանություններին։

Ուսանողների նկատմամբ ընթանում է հետաքննություն՝ ռազմական օբյեկտների պաշտպանության մասին օրենքի խախտման հատկանիշներով։ Ոստիկանության փոխանցմամբ՝ հարցաքննության ժամանակ բոլոր ութ ձերբակալվածները հրաժարվել են ցուցմունք տալ՝ օգտվելով լռելու իրենց իրավունքից։ Տեղում ուսանողները վանկարկել են հակաամերիկյան կարգախոսներ, այդ թվում՝ «Ջախջախենք ԱՄՆ 7-րդ օդային ուժերը»։

ԱՄՆ ռազմական հրամանատարությունը հայտարարել է, որ ռազմակայան անօրինական մուտքի ցանկացած փորձ դիտարկվում է որպես լուրջ միջադեպ և կքննվի երկու երկրների օրենսդրությանը համապատասխան։ «Կորեայի առաջադեմ ուսանողական միությունը» Facebook-յան իր էջում հայտնել է, որ ձերբակալվածները բողոքում էին ԱՄՆ զինվորականների՝ տարածաշրջանում կիսահաղորդիչների արտադրության նախագծին ընդդիմանալու դեմ։ Yonhap լրատվական գործակալության տվյալներով՝ ԱՄՆ-ն ունի կարևոր շահեր ռազմական օդանավակայանի հարցում, որը նախատեսվում է տեղափոխել հենց այդ նախագծի իրականացման պատճառով։

Հիշեցնենք, որ Հարավային Կորեայում տեղակայված է մոտ 28 500 ամերիկացի զինծառայող, որոնց ներկայությունը պայմանավորված է Հյուսիսային Կորեայի կողմից հնարավոր ագրեսիայի զսպմամբ։ Չնայած հանրային լայն աջակցությանը՝ երկկողմ ռազմական դաշինքը պարբերաբար դառնում է բողոքի ակցիաների թիրախ։ Նմանատիպ դեպք գրանցվել էր նաև 2019 թվականին, երբ ուսանողները ներխուժել էին Սեուլում ԱՄՆ դեսպանի նստավայր՝ բողոքելով ռազմական ծախսերի բաշխման վերաբերյալ ԱՄՆ պահանջների դեմ։

Հետևեք մեզ Telegram-ում

Հեղինակ:Աննա Մարտիրոսյան

Հրապարակող:Ազատ TV Խմբագրություն

Հարավկորեացի ուսանողները ձերբակալվել են ամերիկյան ավիաբազա ներխուժելու համար

Ամենադիտվածներ

Նմանատիպ հոդվածներ

Դիտարկելու հարցեր

Դիտանկյուններ

Ամենաթարմ