Lakeshore Records ընկերությունը պաշտոնապես հայտարարել է «Stranger Things» («Շատ տարօրինակ դեպքեր») հանրահայտ սերիալի 10-ամյակին նվիրված վինիլային հավաքածուի թողարկման մասին։ Ինչպես հաղորդում է Film Music Reporter-ը, հավաքածուն ներառում է սերիալի բոլոր հինգ եթերաշրջանների ամբողջական սաունդթրեքը։
Հավաքածուն բաղկացած է 17 ձայնապնակից (LP), որոնցում ընդգրկված է կոմպոզիտորներ Քայլ Դիքսոնի և Մայքլ Սթեյնի երաժշտությունը։ Վերջիններս 2017 թվականին արժանացել են «Էմմի» մրցանակի՝ սերիալի գլխավոր թեմայի համար։ Ձայնապնակները թողարկվում են «Vecna’s Gate Vinyl» անվանումով՝ կարմիր և նարնջագույն երանգներով, ինչպես նաև ներառում են գունավոր ներդիրներ և հատուկ ձևավորված թղթապանակներ։
Lakeshore Records-ը նշում է, որ սա սերիալի երաժշտության ամենաընդգրկուն հավաքածուն է, որը միավորում է նախկինում առանձին թողարկված բոլոր հինգ եթերաշրջանների ալբոմները։ Նախկինում 1-4 եթերաշրջանների սաունդթրեքերը հասանելի էին նաև CD տարբերակով, սակայն այս հավաքածուն դառնում է ֆրանշիզայի պատմության մեջ ամենախոշոր ֆիզիկական թողարկումը։
Հավաքածուի պաշտոնական թողարկումը նախատեսված է հոկտեմբերի 30-ին, սակայն այն արդեն հասանելի է նախնական պատվերի համար Amazon հարթակում։ Սերիալի բոլոր հինգ եթերաշրջանները հասանելի են Netflix հարթակում դիտման համար։