Հնդկական թամիլական կինոյի աստղ Թալապատի Վիջայի վերջին դերակատարումն ամփոփող «Ժանա Նայագան» (Jana Nayagan) քաղաքական-էքշն ֆիլմը հուլիսի 23-ին դուրս է եկել կինոէկրաններ՝ երկարատև հետաձգումներից, իրավական քաշքշուկներից և գրաքննչական խոչընդոտները հաղթահարելուց հետո, հայտնում է Hindustan Times-ը։ Ռեժիսոր Հ. Վինոթի նկարահանած ֆիլմն ընկալվում է որպես Վիջայի հրաժեշտի քայլը կինեմատոգրաֆին, քանի որ դերասանը լիովին կենտրոնանում է իր քաղաքական կարիերայի վրա «Թամիլագա Վետրի Կաժագամ» (TVK) կուսակցության առաջնորդի կարգավիճակում։
Hindustan Times-ի փոխանցմամբ՝ առաջին ցուցադրություններից հետո հանդիսատեսի արձագանքները բավականին հակասական են։ Սոցիալական ցանցերում հնչած վերլուծությունների համաձայն՝ հանդիսատեսը բարձր է գնահատել Վիջայի էկրանային խարիզման և կոմպոզիտոր Անիրուդ Ռավիչանդերի երաժշտական ձևավորումը, սակայն սուր քննադատության է ենթարկել ռեժիսորական աշխատանքը, սցենարի տեմպը և տեսողական էֆեկտների (VFX) որակը։
Ֆիլմը, որը ոգեշնչված է թելուգու լեզվով «Բհագավանթ Քեսարի» հիթից, շատ դիտորդների կարծիքով չի կարողացել ապահովել բնօրինակի լարվածությունը։ Քննադատները նշում են, որ դերասան Բոբի Դեոլի մարմնավորած չարագործի սյուժետային գիծը թույլ է մշակված, իսկ երկրորդ մասի ընթացքը տուժում է անհամաչափությունից։ Այնուամենայնիվ, Վիջայի և դերասանուհի Մամիթա Բայջուի միջև հուզական տեսարանները, ինչպես նաև Պուջա Հեգդեի, Պրակաշ Ռաջի և ԳաուԹամ Վասուդև Մենոնի մասնակցությամբ դրվագները ստացել են դրական գնահատականներ։
«Ժանա Նայագան» ֆիլմի պրեմիերան ի սկզբանե նախատեսված էր հունվարին, սակայն Կինոսերտիֆիկացման կենտրոնական խորհրդի (CBFC) հետ վեճերի պատճառով այն հետաձգվել էր։ Ֆիլմը վերջնականապես էկրան բարձրացավ Վերանայող հանձնաժողովից «A» (մեծահասակների համար) վարկանիշ ստանալուց հետո։ Վիջայի համար սա վերջնական կետ է դնում նրա երեք տասնամյակ տևած կինոկարիերային՝ նշանավորելով անցումը պետական-քաղաքական գործունեության։