Արդարադատության նախարարի տեղակալ Տիգրան Խաչիկյանն այսօր ընդունել է Համաշխարհային բանկի հայաստանյան գրասենյակի ներկայացուցիչներին՝ Քաթրին Փլանգմանի գլխավորությամբ:
Փոխնախարար Խաչիկյանը ողջունել է գործընկերներին Արդարադատության նախարարությունում՝ ներկայացնելով հակակոռուպցիոն ռազմավարության նախագծով և գործողությունների ծրագրով նախատեսված առաջնահերությունները: Փոխնախարարն ընդգծել է, որ նախանշված է մինչև ս.թ. հուլիսի 20-ն ամփոփել ստացված բոլոր առաջարկները և նախագիծը ներկայացնել Կառավարության հաստատմանը: Հակակոռուպցիոն ռազմավարության համատեքստում Տիգրան Խաչիկյանն անդրադարձել է դրա ինստիտուցիոնալ համակարգի՝ հակակոռուպցիոն կոմիտեի և կոռուպցիայի կանխարգելման հանձնաժողովի ձևավորման գործընթացներին:
Քաթրին Փլանգմանն իր հերթին պատրաստակամությունն է հայտնել իրենց նպաստը բերելու ՀՀ կառավարությանը նախանշված ոլորտում առաջանցիկ արդյունքներ գրանցելու համար:
Ամփոփելով հանդիպումը՝ կողմերը պատրաստակամություն են հայտնել շարունակել սերտ համագործակցությունը՝ նախանշված ոլորտներում իրականացվող բարեփոխումների ապահովման համար:
Այս մասին տեղեկացնում են ԱՆ պաշտոնական կայքից։
