Toyota Motor Corp. ընկերությունը պաշտոնապես հայտարարել է Տեխաս նահանգի Սան Անտոնիո քաղաքում իր արտադրական համալիրի 3.6 միլիարդ դոլար արժողությամբ ընդլայնման մասին: Greater:SATX տնտեսական զարգացման կազմակերպության տվյալներով՝ նախագիծը մինչև 2031 թվականը կստեղծի 2000 նոր աշխատատեղ՝ ժամում միջինը 32.46 դոլար աշխատավարձով:
Ընդլայնումը, որը գրեթե կկրկնապատկի գործող հզորությունները, նախատեսում է Tacoma միջին չափի պիկապների արտադրության վերադարձը Միացյալ Նահանգներ: Նշենք, որ նախկինում արտադրության այս գիծը տեղափոխվել էր Մեքսիկա: Greater:SATX-ի գործադիր տնօրեն Սառա Կարաբիաս Ռաշի գնահատմամբ՝ նախագիծը կապահովի շուրջ 30,000 ուղղակի և անուղղակի աշխատատեղ՝ տարածաշրջանի տնտեսությանը բերելով 8.45 միլիարդ դոլարի օգուտ:
Ներդրումը ներգրավելու համար Սան Անտոնիոյի քաղաքային խորհուրդը հաստատել է 122 միլիոն դոլարի հարկային արտոնություններ, իսկ Բեքսար շրջանի հանձնաժողովը հավանություն է տվել 55.3 միլիոն դոլարի հարկային զիջումներին: Քաղաքային իշխանությունները նաև խոստացել են 24.5 միլիոն դոլար հատկացնել ենթակառուցվածքների բարելավման և 8.3 միլիոն դոլար՝ աշխատակիցների վերապատրաստման համար:
Այս քայլը ամրապնդում է Toyota-ի դիրքերը տարածաշրջանում, որտեղ ընկերության ընդհանուր ներդրումները 2003 թվականից ի վեր հասել են 8.3 միլիարդ դոլարի: Բացի այդ, ընկերությունն ավարտում է 531 միլիոն դոլար արժողությամբ հետին առանցքների գործարանի կառուցումը, որը նոյեմբերից կավելացնի ևս 400 աշխատատեղ: