Թրամփը, ըստ տեղեկությունների, մերժել է Հորմուզի նեղուցը բացելու Իրանի առաջարկը

Հորմուզի նեղուցի շուրջ դիվանագիտական փակուղի

ԱՄՆ նախագահ Դոնալդ Թրամփը, ըստ ամերիկացի պաշտոնյաների, մերժել է Հորմուզի նեղուցը յոթ օրվա ընթացքում վերաբացելու Իրանի առաջարկը, հայտնում է The Wall Street Journal-ը։ Իրանական կողմը Քաթարի միջնորդությամբ առաջարկել էր վերադառնալ հունիսի 17-ի Իսլամաբադի փոխըմբռնման հուշագրի (MoU) դրույթներին՝ պահանջելով սառեցված 12 միլիարդ դոլարի ակտիվների ապասառեցում, նավթային պատժամիջոցների վերացում և ծովային շրջափակման դադարեցում։

Իրանի արտգործնախարար Աբբաս Արաղչին նշել է, որ պայմանների կատարման դեպքում նեղուցը կարող է վերաբացվել, իսկ վերջնական համաձայնագրի շուրջ բանակցությունները կմեկնարկեն յոթերորդ օրը։ Իրանի նախագահ Մասուդ Փեզեշքիանը նաև հայտարարել է, որ պատրաստ է թույլատրել ՄԱԿ-ի միջուկային տեսուչների մուտքը երկիր՝ որպես համաձայնության մաս։

Էներգետիկ անվտանգություն և ռազմական լարվածություն

Հորմուզի նեղուցը, որով անցնում է համաշխարհային նավթի և գազի մոտ մեկ հինգերորդը, փակվել է փետրվարի 28-ին ԱՄՆ-ի և Իսրայելի կողմից Իրանի ուղղությամբ իրականացված ավիահարվածներից հետո։ BBC-ի տվյալներով՝ նեղուցի փակումը հանգեցրել է էներգակիրների գների տատանումների և նավագնացության կտրուկ անկման։

Չնայած այն բանին, որ Վաշինգտոնը հայտարարում է միջնորդների միջոցով ընթացող բանակցությունների «կառուցողական» լինելու մասին, պաշտոնական արձագանքը Իրանի վերջին առաջարկին մնում է բացասական։ Անալիտիկները կարծում են, որ նոյեմբերին ԱՄՆ-ում սպասվող միջանկյալ ընտրությունները մեծ ազդեցություն ունեն Թրամփի վարչակազմի որոշումների վրա։ Կա մտավախություն, որ ընտրություններից հետո ռազմական գործողությունների նոր սրացումներ կարող են լինել, եթե Թրամփը չհասնի իր համար ձեռնտու պայմանների։