Թույլ տվեք այդքան էլ վստահ չլինել, որ նշված անձինք շեյխի ներկայացուցիչ էին, որովհետև եթե շեյխի ներկայացուցիչ լինեին, այսինքն ԱՄԷ-ի պաշտոնական ներկայացուցիչ, նրանք կարիք չունեին Գագիկ Ծառուկյանին խնդրեին, որ Գագիկ Ծառուկյանը զանգի ինձ ու խնդրի, որ ես Երևանի քաղաքապետին միջնորդեմ, որ նրանց ընդունի: Այս մասին, այսօր՝ դեկտեմբերի 4-ին, ԱԺ-ում կառավարության հետ հարցուպատասխանի ժամանակ ասել է ՀՀ վարչապետ Նիկոլ Փաշինյանը:
Նա նշել է, որ եթե նրանք շեյխի ներկայացուցիչ էին, կարող էին դեսպանատան միջոցով դիմել։
«Այո, Գագիկ Ծառուկյանը զանգել է ինձ և ասել է, որ խոշոր ներդրողներ են, ես Երևանի քաղաքապետին զանգել եմ և նա կիրակի օրով ընդունել է: Ընդ որում, Գագիկ Ծառուկյանն ինձ ասել է, որ շեյխեր են կամ շեյխերի ներկայացուցիչ են: Երևանի քաղաքապետը արարողակարգային կարգով, հաշվի առնելով նաև իմ զանգը, ընդունել է որպես պաշտոնական ներկայացուցիչ:
Նախ, շատ տարօրինակ է եղել, որ այդ մակարդակի մարդիկ Երևանի քաղաքապետի հետ գալիս են ընդունելության ջինսերով, բոթասներով և մայկաներով: Սա, կարծում եմ՝ վերաբերմունք է պետական ինստիտուտին»,-ասել է Փաշինյանը:
Նա հավելել է, որ նրանք ասել են՝ Երևանի կենտրոնում հող ենք ուզում բիզնես դնելու համար։
«Երևանի քաղաքապետարանն ասել է, որ ցավոք, ձեր նշած տարածքներում հող Երևանի քաղաքապետարանի տիրապետության տակ չկա: մասնավորը գուցե ունենա, պետք է գնել:
Հընթացս, երեք հյուրերն էլ պարզվել է հեռախոս են ունեցել մոտները և զանգ են ստացել: Երբ քաղաքապետը նրանց ներկայացնելիս է եղել այդ հնարավորությունները, սկզբից մեկն է սկսել հեռախոսով խոսել: Քաղաքապետը ստիպված է եղել ընդհատել խոսքը, սապասել, հետո երկրորդի հեռախոսին է զանգ եկել: Բայց երբ որ երրորդին էլ է զանգ եկել, քաղաքապետն ասել է, որ ենթադրում եմ, որ այս խոսակցությունը այլևս հետաքրքիր չէ ձեզ»,-պատմել է վարչապետը:
Նա համոզմունք հայտնեց, որ քաղաքապետը ճիշտ է արել։
«Որովհետև եթե մարդիկ կան, որ թույլ են տալիս, որ իրենց հետ այդպես վարվեն, և իրենց համար Հայաստանի պետականությունը դա է, որ պետք է ջինսով, բոթասով մտնեն, քաղաքապետին ասեն՝ դու ստեղից էնտեղ գնա, այդ ժամանակները պրծել են:
Եթե ՀՀ-ում այդպիսի քաղաքապետներ, նախարարներ են եղել, որոնց հետ այդպիսի հարաբերություններ են ունեցել, իրենց ժամանակն ավարտվել է վաղուց»,-եզրափակել է Նիկոլ Փաշինյանը։
