ԱՄՆ փոխնախագահ Ջեյ Դի Վենսը հայտարարել է, որ Միացյալ Նահանգները կշարունակի Իրանի դեմ ռազմական գործողությունները կարճ ժամանակով՝ Իրանի վարչակարգի երկարաժամկետ չեզոքացումն ապահովելու նպատակով։ Բենի Ջոնսոնի հետ հարցազրույցում Վենսը ընդգծել է, որ հակամարտությունը ռազմավարական անհրաժեշտություն է՝ ուղղված Թեհրանի միջուկային հավակնությունները զսպելուն և տարածաշրջանային անկայունությանը վերջ դնելուն։
Վենսի խոսքով՝ Վաշինգտոնի նպատակն է «չեզոքացնել» Իրանի ռազմական կարողությունները, և ԱՄՆ-ն արդեն հասել է իր մարտավարական նպատակների մեծամասնությանը։ Այս հայտարարությունը հնչել է փետրվարի 28-ին իրականացված համատեղ ամերիկա-իսրայելական հարվածներից հետո, որոնք հանգեցրել են Իրանի պատասխան գործողություններին Քուվեյթում, ԱՄԷ-ում, Քաթարում, Բահրեյնում և Հորդանանում տեղակայված ամերիկյան բազաների ուղղությամբ։
Անդրադառնալով վառելիքի գների աճին՝ փոխնախագահը դրանք որակել է որպես «շատ ժամանակավոր արձագանք» և վստահեցրել, որ ԱՄՆ-ն Իրանում երկար մնալու մտադրություն չունի։ «Մենք հետաքրքրված չենք Իրանում մեկ կամ երկու տարի մնալով։ Մենք գործն ավարտում ենք և շուտով դուրս կգանք, իսկ վառելիքի գները կրկին կնվազեն»,- հայտարարել է Վենսը։ ԱՄՆ Կենտրոնական հրամանատարությունը հաստատել է այս դիրքորոշումը՝ հրապարակելով իրանական ռազմանավերի ոչնչացման կադրեր և հայտարարելով, որ տարածաշրջանային ջրերում իրանական սպառնալիքների ժամանակաշրջանն ավարտված է։