Այսօր՝ փետրվարի 20-ին, Երևանի քաղաքապետարանում անցկացվել են Երևանի 2018 թվականի բյուջեի կատարման և զարգացման ծրագրով իրականացված աշխատանքների հաշվետվությունների բաց հանրային քննարկումներ: Քննարկման ժամանակ օնլայն հարցադրում է ներկայացրել քաղաքացի Միքայել Մանոյանը: Հարցը վերաբերում էր վերելակներին: Արդյո՞ք 2019թ. բյուջեում առկա են բավարար միջոցեր՝ վերելակների հիմնախնդիրները լուծելու համար: Հարցին պատասխանեց Երևանի փոխքաղաքապետ Հայկ Սարգսյանը:
«Եթե խոսքը վերաբերում է ընթացիկ պահպանման ու շահագործման միջոցառումներին, ապա այո´, նախատեսված են միջոցներ և բավարարելու են, որ շահագործումն իրականացվի ոչ պակաս մակարդակով, քան նախկինում, իսկ եթե խոսքը վերելակային ֆոնդի նորացման մասին է, ապա ո´չ: Վերելակների փոխարինման մեր նախագիծը բյուջետային նախագիծ չէ: Նախնական գնահատմամբ` այդ նախագիծը ունի առնվազն 25 մլրդ դրամի տարողունակություն այն պայմաններում, երբ Երևանի սեփական եկամուտներով հավաքագրվող բյուջեն կազմում է ընդամնեը 23 մլրդ դրամ», – ասաց Հայկ Սարգսյանը:
Փոխքաղաքապետը նաև նկատեց, որ լրամշակումով կլինի բյուջեի զգալի ավելացում, այնուամենայնիվ, դա բավարար չի լինի այդ ծրագիրն իրականացնելու համար, ուստի նորացման ծրագիրը նախատեսվում է իրականացնել այլ միջոցներով: