Այսօր Վրաստանի վարչապետ Գեորգի Գախարիան ճեպազրույցի ժամանակ հայտնել է, որ կառավարությունը որոշել է արտակարգ դրությունը երկարաձգել մինչև մայիսի 10-ը։ Արգելվել են նաև չորս մեծ քաղաքներ՝ Թբիլիսի, Ռուսթավի, Բաթումի և Քութաիսի ելքն ու մուտքը։
«Ցավոք, կարող ենք արձանագրել այն փաստը, որ մեզ մոտ առաջին անգամ գրանցվել է 30 վարակված մարդ մեկ օրվա ընթացքում։ Կարելի է ասել, որ մենք մտել ենք երկրում ներքին տարածման լայնամասշտաբ փուլ»,- ասել է Գախարիան։
Վարչապետը հայտնել է, որ այսօր անհնար է ճիշտ կանխատեսել, թե երբ վիրուսի տարածումը կհասնի առավելագույնին։ Գախարիան նշել է, որ յուրաքանչյուր գործողություն մեծ կարևորություն ունի։
«Սրանք քայլեր են, որոնք անհրաժեշտ է ձեռնարկել անհապաղ, որպեսզի անցնենք վիրուսի տարածումը զսպելու նոր փուլին»,- ասել է Գախարիան։
Աղբյուրը՝ Նովոստի-Գրուզիա։