ԱՄՆ ռազմական հետախուզության նախկին վերլուծաբան Չելսի Մենինգը ազատվելուց ընդամենը մեկ շաբաթ հետո կրկին բանտարկվել է: Պատճառն այն է, որ Մենինգը հրաժարվում է պատասխանել WikiLeaks-ի գործով մեծ ժյուրիի հարցերին. ժյուրին երդվյալների ընդլայնված կոլեգիա է:
Ամերիկյան օրենքներով ցուցմունք տալուց հրաժարվելը գնահատվում է որպես դատարանի հանդեպ անհարգալից վերաբերմունք, որը սպառնում է բանտարկությամբ: Մենինգը բանտարկվել է Վիրջինիա նահանգի Ալեքսանդրիա քաղաքի շրջանային դատարանի դատավոր Էնթոնի Թրենգիի որոշմամբ:
Ավելին՝ Մենինգը 30 օր հետո ստիպված կլինի վճարել օրական 500 դոլար տուգանք, եթե այդպես էլ հանդես չգա մեծ ժյուրիի առաջ: 60 օր հետո տուգանքի գումարը կդառնա օրական մինչև 1000 դոլար:
Հինգշաբթի երեկոյան դատարանի դահլիճում Մենինգը հայտարարել էր, որ «ավելի շուտ սովից կմեռնի, քան կփոխի ցուցմունք տալու վերաբերյալ իր տեսակետը»: Իսկ դատավորը որոշում կայացնելուց առաջ ասել էր, թե «ոչ մի խայտառակ բան չկա ԱՄՆ քաղաքացու պարտականությունները կատարելու մեջ»:
Մենինգի փաստաբանները պնդել են, որ կարիք չկա նրան բանտարկելու, քանի որ նա ապացուցել է, որ մեծ ժյուրիի հարցերին չի պատասխանի անկախ այն բանից, թե որքան երկար ժամանակ կացկացնի բանտում:
Դաշնային օրենքի համաձայն՝ ցուցմունքներ տալուց հաժարվող վկան կարող է բանտարկվել դատարանի հանդեպ անհարգալից վերաբերմունքի համար, եթե հավանականություն կա, որ բանտարկությունը նրան կստիպի փոխել իր տեսակետը և պատասխանել դատավորի կամ երդվյալների հարցերին: Փաստաբաններն ավելի վաղ պնդում էին, որ Մենինգին ազատազրկելը պատժիչ միջոց է դառնում, քանի որ նա չի պատրաստվում իր սկզբունքներին դավաճանել:
Մենինգին դատարանի դահլիճից տեղափոխել են Ալեքսանդրիայի բանտ: Եթե նա չհամաձայնվի պատասխանել երդվյալների հարցերին, ստիպված կլինի բանտում անցկացնել մինչև 18 ամիս, երբ կլրանա մեծ ժյուրիի լիազորությունների ժամկետը:
Մենինգի և նրա փաստաբանների համար որոշումն անսպասելի չէր: 2019 թվականին նա արդեն 62 օր անցկացրել էր բանտում նույն դատարանի համանման որոշմամբ: WikiLeaks-ի իրազեկիչն ազատվել էր ընդամենը մեկ շաբաթ առաջ և արդեն այդ ժամանակ գիտեր, որ մայիսի 16-ին կրկին ստիպված է լինելու կանգնել դատարանի առաջ: