Խորհրդարանում հյուրընկալվել են ԲՀԿ ուսանողական խորհրդի անդամները

Հունիսի 20-ին ՀՀ ԱԺ պատգամավոր Գևորգ Պետրոսյանը հանդիպել է ԲՀԿ ուսանողական խորհրդի անդամների հետ: Ներկայացնելով կուսակցության տեսլականը՝ նա ընդգծել է, որ այն ստեղծման օրվանից իր ծրագրում հատուկ տեղ է հատկացրել պետության սոցիալական խնդիրների իրականացմանը, մարդկանց կենսամակարդակի բարձրացմանն ուղղված միջոցառումներին:

«Մեր քննադատական կեցվածքն ինքնանպատակ չէ, մենք իրատես քաղաքական ուժ ենք»,- ասել է պատգամավորը հավելելով, որ «Բարգավաճ Հայաստան» խմբակցությունը սոցիալական, կրթական և այլ ոլորտները կարգավորող նախագծեր է ներկայացրել, որոնց մի մասն ընդունվել է, մյուս մասը չի արժանացել կառավարության դրական եզրակացությանը:

Գևորգ Պետրոսյանի կարծիքով՝ անհրաժեշտ է ապահովել այն ակնկալիքը, ինչի համար ժողովուրդն ընտրության միջոցով քաղաքական-կուսակցական գործիչներին գործուղել է խորհրդարան:

Խոսելով Հայաստան-Արցախ հարաբերություններից՝ նա անընդունելի է համարել երկու պետությունների միջև սեպ խրելը:

Գևորգ Պետրոսյանը կարևորել է երիտասարդության դերը երկրի զարգացման գործում:

Պատգամավորը պատասխանել է նաև ուսանողների հարցերին, որոնք հիմնականում առնչվել են դատաիրավական ոլորտին, «Բարգավաճ Հայաստան» խմբակցության ծրագրերին ու օրենսդրական նախաձեռնություններին:

Ամենաթարմ