Երևանը պատրաստվում է մայիսի 3-4-ին հյուրընկալել Եվրոպական քաղաքական համայնքի ութերորդ գագաթնաժողովը, որը կարևոր հարթակ է դառնալու տարածաշրջանային և եվրոպական անվտանգային մարտահրավերների քննարկման համար։ ԱԳ փոխնախարար Վահան Կոստանյանի փոխանցմամբ՝ Վրաստանը հաստատել է մասնակցությունը, սակայն Թուրքիայից և Ադրբեջանից դեռևս հստակ պատասխան չկա։ Գագաթնաժողովի օրակարգում ընդգրկված են հիբրիդային սպառնալիքները, ժողովրդավարական դիմակայությունը և էներգետիկ անվտանգությունը՝ թեմաներ, որոնք արդիական են Հայաստանի ժողովրդավարական օրակարգի համար։
Հայաստանը գագաթնաժողովը դիտարկում է ոչ միայն որպես դիվանագիտական հարթակ, այլև որպես հնարավորություն՝ բարձրացնելու երկրի քաղաքական կշիռն ու ճանաչելիությունը։ Չնայած հնարավոր մտահոգություններին, թե միջոցառումը կարող է ընկալվել որպես հակառուսական պլացդարմ, պաշտոնական Երևանը շեշտում է, որ Հայաստանը հանդես է գալիս որպես հյուրընկալ պետություն, որը հնարավորություն է տալիս մասնակիցներին արտահայտելու իրենց դիրքորոշումները։ Այս գագաթնաժողովը կարող է լուրջ խթան հանդիսանալ Հայաստանի երկկողմ հարաբերությունների զարգացման համար՝ ամրապնդելով երկրի դիրքերը միջազգային հարթակում։