Սփյուռքի գործերի գլխավոր հանձնակատար Զարեհ Սինանյանն աշխատանքային այցով գտնվում է Ֆրանսիայի Հանրապետությունում։ Այս մասին նա գրառում է կատարել Facebook-ի իր էջում:
«Այցելեցի Հայ Ավետարանական եկեղեցի և հանդիպում ունեցա Հայ Ավետարանական համաշխարհային խորհրդի պատվավոր փոխնախագահներ պատվելի Հովել Միքայելյանի (Ֆրանսիայի Հայ Ավետարանական եկեղեցիների նախագահ) և Ռենե Լևոնյանի հետ (Եվրասիայի Հայ Ավետարանական եկեղեցիների նախագահ)։
Այնուհետ եղա Սևրի «Սամուել-Մուրատ» (Collège Samuel Mourad, Sèvres) վարժարանում, շրջայց կատարեցի։ Ընդգծեցի, որ, որպես հայ մարդ, մեծ ցավ եմ ապրում՝ տեսնելով դպրոցն այս կարգավիճակում։ Այստեղ պատմություն է կերտվել, և այն ոչ մի գնով չպետք է փակի իր էջը։
- Զարեհ Սինանյանը Ֆրանսիա այցի ժամանակ այցելել է Հայաստանի էսպլանադ
- Զարեհ Սինանյանն այցելել է ՄԱԿ-ում ՀՀ մշտական ներկայացուցչություն
Հաջորդ հանդիպումը Փարիզի միջազգային համագործակցության հարցերով փոխքաղաքապետ Առնո Նգաչայի հետ էր, որի ընթացքում քննարկեցինք ինչպես հայ-ֆրանսիական հարաբերություններին, այնպես էլ Փարիզում բնակվող հայերին առնչվող հարցեր։
Պաշտոնական հանդիպումից հետո այցելեցի Փարիզի Հայ Կաթողիկե Սուրբ Խաչ եկեղեցի, ծանոթացա եկեղեցու հարուստ պատմությանը, վերանորոգման արդյունքներին: Օրն ամփոփեցի՝ պատասխանելով ֆրանսահայ լրատվամիջոցների հարցերին»,- գրել է Սինանյանը: