Այսօր հրավիրված մամուլի ասուլիսի ժամանակ ՀՀ առողջապահության նախարար Արսեն Թորոսյանն անդրադարձել է նաև վերարտադրողական առողջության հարցերին.
«Նման ծրագիր ժամանակին եղել է, բայց ոչ օբյեկտիվ է գործել: Դրա մասին հայտարարություն է եղել նաև ԱԺ-ում՝ նախկին կառավարության ժամանակ, 50 միլիոնի շրջանակներում էր, եթե չեմ սխալվում: Մենք էս տարի դրա համար 210 միլիոն դրամ ենք նախատեսել, կոչվում է «Անպտուղ զույգերի համար վերարտադրողական օժանդակ տեխնոլոգիաների կիրառման բժշկական օգնության ծառայություններ»:
Մենք այս շաբաթ հանդիպում ունենք՝ որոշելու համար, թե այդ 210 մլն դրամն ինչպես ենք ծախսելու: Նախնական ասեմ, որ հակվածությունն անպտղության պատճառները պարզելն է լինելու, մի մասն էլ արտամարմնային բեղմնավորման ծառայությունների գնումը: Փորձը ցույց է տալիս, որ ավելի արդյունավետ է պարզել պատճառը և լուծել, դա շատ ավելի էժան է և ավելի շատ մարդկանց վրա կարող ես օգտագործել, քան թե պարզապես մի քանի տասնյակ զույգերի անես արտամարմնային բեղմնավորում: Բայց երկուսն էլ լինելու են՝ հիմնականում շեշտը դնելով պատճառները պարզելու և վերացնելու վրա», – ասել է Թորոսյանը: