Հարավկորեական Samsung ընկերությունը ներկայացրել է իր Galaxy S10 շարքը, որում ներառված է 3 մոդել՝ S10e, S10 և S10 Plus։ Շնորհանդեսի ամենագլխավոր նորույթը եղել է Galaxy Fold-ը․ սմարթֆոնը ճկվում է և կարող է վերափոխվել պլանշետի։
Ընկերության նախագահ և գլխավոր գործադիր տնօրեն Դոնգ Ջին Կոն շնորհանդեսի ժամանակ հայտարարել է, որ Galaxy Fold մոդելի թողարկումն ապացուցում է, որ սմարթֆոնների զարգացումը դեռևս ավարտված չէ, իսկ այդ ոլորտում ինովացիաները դեռևս հնարավոր են։
Galaxy Fold-ը հանդերձված է աշխարհում առաջին ճկվող, առանց շրջանակի Infinity Flex Display էկրանով, որի անկյունագիծը 7․3 դյույմ է։ Սարքն ունի 6 տեսախցիկ, 12 ԳԲ օպերատիվ հիշողություն, հասանելի է 256 ԳԲ, 512 ԳԲ կամ 1 ՏԲ ներկառուցված հիշողությամբ տարբերակներով։
