Դեկտեմբերի 19-ին Եվրոպական խորհրդարանը, 434 կողմ, 30 դեմ և 89 ձեռնպահ ձայներով, ընդունեց բանաձև, որով խստորեն դատապարտում է Ադրբեջանում քաղաքացիական հասարակության, անկախ լրատվամիջոցների և քաղաքական ընդդիմության նկատմամբ շարունակվող ճնշումները։ Բանաձևը անդրադառնում է մարդու իրավունքների խախտումների խորացմանը և պահանջում նպատակաուղղված պատժամիջոցներ սահմանել Ադրբեջանի պաշտոնյաների նկատմամբ։
Բանաձևի ընդունմանը նախորդել էր դեկտեմբերի 18-ին խորհրդարանական քննարկումը, որտեղ տարբեր պատգամավորներ անդրադարձել էին Ադրբեջանում քաղաքացիական ազատությունների սահմանափակումներին, ինչպես նաև Լեռնային Ղարաբաղի հարցին։ Խորհրդարանականները խստորեն դատապարտել են Ալիևի վարչակարգի կողմից մամուլի ազատության և այլախոհության նկատմամբ իրականացվող բռնաճնշումները։
Եվրախորհրդարանը կոչ է արել անհապաղ ազատ արձակել բոլոր քաղաքական դրդապատճառներով ձերբակալվածներին, ներառյալ լրագրողները, իրավապաշտպանները և ընդդիմադիր գործիչները։ Բանաձևում շեշտվում է նաև Ադրբեջանի կողմից կալանքի անմարդկային պայմանների, խոշտանգումների և կին քաղբանտարկյալների նկատմամբ հատուկ ոտնձգությունների փաստերը։
Բանաձևում հիշատակվում են 23 հայ գերիներ, այդ թվում՝ Լեռնային Ղարաբաղի չճանաչված հանրապետության նախկին ղեկավարները։ Խորհրդարանը պահանջում է նրանց անհապաղ ազատ արձակումը՝ մարդու իրավունքների միջազգային նորմերի շրջանակում։
Խորհրդարանի անդամներ Բերտ-Յան Ռուիսենը և Մարինա Մեսուրեն, ինչպես նաև մի քանի այլ պատգամավորներ, առանձնահատուկ ընդգծել են Ադրբեջանի նկատմամբ պատժամիջոցների խստացման անհրաժեշտությունը՝ մարդու իրավունքների շարունակական ոտնահարման և հայության բռնի արտաքսման կապակցությամբ։ Մեսուրեն հայտարարել է. «Ադրբեջանը շարունակում է մնալ մամուլի ազատության և մարդու իրավունքների խախտումների ամենավատ օրինակներից մեկը։ Human Rights Watch-ը փաստագրել է խոշտանգումների և նվաստացնող վերաբերմունքի դեպքեր բանտարկյալների նկատմամբ»:
Բանաձևում նշվում է նաև 2022 թվականի էներգետիկ համագործակցության հուշագիրը կասեցնելու անհրաժեշտությունը՝ հաշվի առնելով Ադրբեջանում մարդու իրավունքների շարունակական խախտումները։