Եվրոպայի խորհրդի մարդու իրավունքների հանձնակատար Դունյա Միյատովիչը դատապարտել է Լեռնային Ղարաբաղում ռազմական էսկալացիան և դրա ազդեցությունը խաղաղ բնակչության, հատկապես ամենախոցելի խավերի վրա։
«Ես խորապես մտահոգված եմ՝ տեսնելով, որ հերթական անգամ վտանգվում է նրանց անվտանգությունը, ոտնահարվում մարդու իրավունքները՝ խորացնելով տառապանքը»,- ասել է Մարդու իրավունքների հանձնակատարը։
Միյատովիչը ընդգծել է, որ պետք է վերջ տալ տարածաշրջանում ռազմական գործողություններին՝ խաղաղ բնակչության անվտանգության ապահովման համար, ինչպես նաև ապահովել մարդասիրական օգնության և մարդու իրավունքների պաշտպանների անարգել մուտքը:
«Պետք է շտապ վերականգնվեն հաշտեցման հնարավորությունն ու երկխոսությունը, երաշխավորվի տուժած բնակչության իրավունքների լիարժեք հարգանքը՝ կայուն խաղաղություն ապահովելու համար»,- նշել է Եվրոպայի խորհրդի մարդու իրավունքների հանձնակատարը և հաստատել, որ պատրաստ է մեկնելու տարածաշրջան՝ օգնելու հաղթահարել մարդու իրավունքների առկա մարտահրավերները:
