Թաիլանդի ընտրություններում առաջատար են զինվորականների կողմնակիցները

Կիրակի Թաիլանդում անցկացված խորհրդարանական ընտրությունների նախնական արդյունքները հայտնի են։ Քվեաթերթիկների 89 տոկոսի հաշվարկից հետո առաջատարը զինվորականների կողմնակիցներն են «Պալանգ Պրաչարատ» կուսակցությունից։ Նրանք ստացել են ընտրողների առնվազն 7 միլիոնի աջակցությունը, մինչդեռ նրանց հիմնական մրցակից՝ «Փհեու Թայ» կուսակցության ներկայացուցիչները՝ 6․6 մլն-ի աջակցությունը։ Այս մասին հայտնում է երկրի ընտրական հանձնաժողովը։ Մասնակցությունն ընտրություններին կազմել է 80 տոկոս։

Ինչպես ավելի վաղ հայտնել էինք, Թաիլանդում 2011 թվականից ի վեր առաջին անգամ խորհրդարանական ընտրություններ են անցկացվել։ Երկրում քվեարկելու իրավունք ունեցող քաղաքացիների թիվը 51․4 մլն է։

Այժմ վարչապետի պաշտոնը զբաղեցնում է գեներալ Պրայուտ Չան-Օչան, որն իշխանության է եկել 2014 թվականին՝ զինված հեղաշրջման արդյունքում։