ՆԱՏՕ-ն և Թբիլիսին քննարկում են Վրաստանին աջակցելու համար համագործակցության խորացման հնարավորությունները՝ կապված Սև ծովի իրադրության հետ: Այդ մասին մարտի 25-ին Թբիլիսիում հայտարարել է դաշինքի գլխավոր քարտուղար Յենս Ստոլտենբերգը, որն այցով հանրապետությունում է ՆԱՏՕ-Վրաստան համատեղ զորավարժությունների կապակցությամբ:
«Ներկայում մենք մտածում ենք, թե էլի ինչ կարող ենք անել Վրաստանի ծովային հնարավորությունների ոլորտում»,-ասել է Ստոլտենբերգը՝ ամփոփելով երկրի վարչապետ Մամուկա Բախտաձեի հետ կայացած հանդիպման արդյունքները: Ընդսմին նա հայտարարել է Սև ծովի տարածաշրջանում «Ռուսաստանի ներկայության զգալի ուժեղացման» մասին: «Մենք կիսում ենք ձեր մտահոգությունը՝ Սև ծովի տարածաշրջանում Ռուսաստանի ռազմական ուժեղացման կապակցությամբ: Հենց դրա համար էլ մենք ուժեղացնում ենք մեր համագործակցությունը, այդ թվում՝ ծովային ուժերի ոլորտում: Մենք ուսուցում ենք տրամադրում վրացական առափնյա պահպանությանը, և այսօրվա հանդիպման ընթացքում մենք քննարկեցինք, թե էլի ինչ կարող ենք անել մեր համագործակցույթան ուժեղացման համար»,-ասել է Ստոլտենբերգը:
ՆԱՏՕ-ի գլխավոր քարտուղարը հայտարարել է, որ Վրաստանը մեծ հաջողության է հասել եվրատլանտյան ինտեգրացման ճանապարհին, և նա անպայման ի վերջո կդառնա դաշինքի անդամ, սակայն չի ճշտել ո՛չ անդամակցության ժամկետը, ո՛չ էլ այն, թե նա կկարողանա արդյոք դա անել առանց Աբխազիայի և Հարավային Օսիայի: Ստոլտենբերգը նշել է, որ ՆԱՏՕ-ին անդամակցելու որոշումն ընդունում է Վրաստանն ինքը և դաշինքի մյուս անդամները: Ուստի «Ռուսաստանը կամ որևիցե այլ երկիր չի կարողանա ազդել այդ գործընթացի վրա»:
Նա մեկ անգամ ևս հավաստել է, որ դաշինքը պաշտպանում է Վրաստանի տարածքային ամբողջականությունն ու ինքնիշխանությունը միջազգայնորեն ճանաչված սահմանների շրջանակում և կոչ է անում Ռուսաստանին՝ հրաժարվել Աբխազիայի և Հարավային Օսիայի անկախության ճանաչումից, հաղորդել է ՌԻԱ Նովոստին:
ԽՈՐՀՈւՐԴ Է ՏՐՎՈւՄ ԿԱՐԴԱԼ
