Aysor.am-ը գրում է.
Հայաստանի Հատուկ քննչական ծառայությունը մերժել է Ազգային անվտանգության ծառայության վերաբերյալ դիմումի հիման վրա քրեական գործ հարուցել` հանցադեպի բացակայության հիմքով:
«Քրեական գործի հարուցումը մերժվել է հանցադեպի բացակայության հիմքով», – ասաց ՀՔԾ խոսնակ Մարինա Օհանջանյանը:
Հիշեցնենք` ավելի վաղ իրավապաշտպան Արթուր Սաքունցը և «Իրազեկ քաղաքացիների միավորման» ծրագրերի համակարգող Դանիել Իոաննիսյանը Հատուկ քննչական ծառայություն հանցագործության մասին հաղորդում էին ներկայացրել` պնդելով, որ Ազգային անվտանգության ծառայությունում տեղի է ունեցել պաշտոնեական դիրքի չարաշահում։
Բանն այն է, որ վերջերս Ազգային անվտանգության ծառայությունը նամակ էր ուղարկել «Քաղաքացու որոշում» (ՔՈ) կուսակցության անդամ Գարեգին Միսկարյանին՝ պահանջելով հերքել իր ֆեյսբուքյան գրառումը ԱԱԾ տնօրեն Արթուր Վանեցյանի՝ ծաղիկների բիզնես ունենալու և վառելանյութ ներկրելու մասին:
Գրառման մեջ Միսկարյանը նշել էր․
«Էն, որ Վանեցյանի ընտանիքը ծաղիկի բիզնես ունի ու դրա ջերմոցների անվան տակ ժամանակին պարսկական դիզելը վառարանի վառելանյութի անվան տակ մաքսազերծում ու վաճառում էին` լսել էինք, բայց որ Նոր Հայաստանում էլ վառելանյութի ներկրմամբ էին զբաղվում, դա նորություն էր»։
ԱԱԾ-ից, ըստ էության, հերքող նամակը ստանալուց հետո Միսկարյանը «որպես բարի կամքի դրսևորում» ֆեյսբուքում հերքում էր հրապարակել՝ ընդգծելով, որ այլևս չի հավատում մամուլում և հանրության մեջ շրջանառվող ու գրառման մեջ տեղ գտած լուրերին:
Սաքունցն ու Իոաննիսյանն էլ պնդել էին, որ պաշտոնական անձինք պաշտոնեական դիրքը օգտագործել են, որպեսզի պաշտպանեն ԱԱԾ-ի տնօրեն Արթուր Վանեցյանի այն շահերը, որոնք ենթակա են պաշտպանության իրավաքաղաքացիական հարաբերությունների սահմաններում։
