Ֆրանսիայի արտգործնախարար Ժան-Նոել Բարոն հայտարարել է, որ Ուկրաինան ունի իրավունք օգտագործելու Փարիզի կողմից տրամադրված մեծ հեռահարության SCALP հրթիռները Ռուսաստանի թիրախների դեմ՝ «ինքնապաշտպանության տրամաբանությամբ»։ Այս մասին նախարարը նշել է BBC-ին տված հարցազրույցում՝ ընդգծելով, որ սկզբունքը Ուկրաինայի նախագահ Վլադիմիր Զելենսկիի հետ քննարկումների ընթացքում ստացել է հավանություն։ Սակայն նա չհստակեցրեց՝ արդյոք այդ հրթիռներն արդեն օգտագործվել են այս կերպ։
Նախարարը հայտարարել է, որ արևմտյան դաշնակիցները չպետք է ունենան «կարմիր գծեր» Ուկրաինային աջակցելու հարցում։ Ֆրանսիան պատրաստ է աջակցել Ուկրաինային այնքան ժամանակ, որքան անհրաժեշտ է, ընդգծելով, որ յուրաքանչյուր ռուսական առաջխաղացում վտանգ է Եվրոպայի համար։
Բարոն նաև հավելել է, որ Ֆրանսիան «բաց է Ուկրաինային ՆԱՏՕ-ին անդամակցության հրավեր ուղարկելու» և աշխատում է իր դաշնակիցներին համոզելու ուղղությամբ։
Ռուսաստանի ԱԳՆ պաշտոնական ներկայացուցիչ Մարիա Զախարովան քննադատել է Ֆրանսիայի որոշումը՝ անվանելով այն «Ուկրաինայի ոչնչացման քայլ»։ Նրա խոսքով, SCALP հրթիռների կիրառումն Ուկրաինայի կողմից փաստացի պատերազմ է Ռուսաստանի դեմ։
Ֆրանսիայի հայտարարությունը հաջորդում է ԱՄՆ նախագահի որոշմանը չեղարկել ATACMS հրթիռների կիրառման սահմանափակումները և Մեծ Բրիտանիայի թույլտվությանը՝ օգտագործելու Storm Shadow հրթիռները Ռուսաստանի տարածքում։ Այս քայլերը պատասխանում են ռուսական ռազմական առաջխաղացմանը և Հյուսիսային Կորեայի ներգրավվածությանը հակամարտությունում։
SCALP հրթիռները համարվում են բրիտանական Storm Shadow-ի անալոգ՝ հատուկ տեխնոլոգիական տարբերություններով։ Այս տեսակի հրթիռները նախատեսված են հեռահար հարվածների համար՝ մեծացնելով Ուկրաինայի հնարավորությունները պաշտպանական և հարձակողական գործողություններում։
ԽՈՐՀՈւՐԴ Է ՏՐՎՈւՄ ԿԱՐԴԱԼ
