Հայաստանի Հանրապետության Պաշտպանության նախարարության ռազմական ոստիկանությունը ներկայացրել է 2024 թվականի ընթացքում կատարված աշխատանքների ամփոփագիրը։ Ռազմական ոստիկանության հիմնական ուշադրությունը կենտրոնացած է եղել կանխարգելիչ միջոցառումների, կարգապահական հսկողության և օպերատիվ-հետախուզական գործողությունների վրա՝ զինված ուժերում անվտանգության և կարգապահության մակարդակը բարձրացնելու նպատակով։
Տարվա ընթացքում ռազմական ոստիկանությունը կազմակերպել է 6842 կանխարգելիչ միջոցառում և անակնկալ ստուգայցեր զորամասերում և մարտական հենակետերում։ Այս գործողությունների արդյունքում հայտնաբերվել են արգելված սարքավորումներ, այդ թվում՝ սմարթֆոններ և այլ ոչ թույլատրված պարագաներ, ինչը կարևոր քայլ է եղել անվտանգության պահպանման և զինվորական ծառայության կարգապահության ամրապնդման համար։
Ռազմական ոստիկանության ստորաբաժանումների կողմից ստացված օպերատիվ տվյալների հիման վրա բացահայտվել են մի շարք իրավախախտումներ, որոնցով նախաձեռնվել են քրեական վարույթներ։ Այդ գործողությունների արդյունքում հայտնաբերվել են տարբեր տեսակի զենքեր և զինամթերք, ներառյալ՝ գնդացիրներ, ինքնաձիգներ և ատրճանակներ։
Ռազմական ոստիկանության ծառայողները տարվա ընթացքում պարբերաբար այցելել են մարտական դիրքեր՝ ծառայության պատշաճ կազմակերպումը վերահսկելու, առկա խնդիրներն ուսումնասիրելու և դրանց լուծմանն օժանդակելու նպատակով։ Այս այցերը ներառել են նաև գիշերակաց՝ ցուցաբերելով լրացուցիչ աջակցություն զինվորականներին։
2024 թվականին ՌՈ-ն «Կարգազանց-2024» նշանաբանով իրականացրել է 298 միջոցառում՝ վեր հանելով կարգապահական տարբեր խախտումներ։ Բացի այդ, ռազմական ոստիկանության զինավտոտեսչությունը շուրջօրյա ծառայության ընթացքում հայտնաբերել է ճանապարհային երթևեկության կանոնների խախտումներ։
ՀՀ ՊՆ ռազմական ոստիկանությունը հորդորում է զինծառայողներին պահպանել զինվորական բարեվարքության նորմերը, հետևել օրենքներին և կանոնագրքերին՝ նպաստելով զինված ուժերի կարգապահության և անվտանգությանը։
